Khawvél Sunday School Ni urhsun takin hman a ni

November thla Pathianni hmasa ber a hman thin, Khawvél Sunday School Ni chu nimin khan Presbyterian Kohhran leh Baptist Church of Mizoram (BCM) te chuan urhsun takin an hmang a ni.

Presbyterian Kohhran chuan he ni pual hian chawhma leh chawhnu Inkhawm ah thupui zirho tur bik siamin Kohhran hrang hrangah hun an hmang a, he Ni puala Thawhlawm an lakkhawm te pawh Bial kaltlangin Synod Office-ah thehluh a ni bawk a ni.

Baptist Church of Mizoram (BCM) chuan kum 1939 khan All India Sunday School Union zawmin hemi kum atang hian Khawvel Sunday School Ni hi an hmang a, kumtin thupui thlansa hmanga hun hman thin niin kumin hian ‘Pathian thu kan kawng entu’ tih chu thupui-ah an hmang a, he ni puala zir tur buatsaih chu Kohhran hrang hrangah an zir bawk a ni.

Sunday School hmasa ber chu kum 1780 July thlaah khàn Scotland ram Gloucester khuaah neih tan a ni a, a dinchhuaktu chu Robert Raikes niin thilsiamna hmuna thawk naupangte, ziah leh chhiar thiam lo, inkhawm ngai miah lote chu hruai khawmin India ramah July 9, 1803 atangin Missionary William Carey-a leh a thiante (Serampore Trio) hmalaknain Sunday School neih tan a ni bawk a. Mizoram-ah chuan kum 1944 atangin Khawvel Sunday School Ni hi hman tan ni thungin kum 1949 atangin November Pathianni hmasa berah thupui nei hian hman thin a ni.