Neihloh khua ah 'Cultural Meet' hlawhtling takin nei
Neihloh Mual zawl-a 'Cultural Meet' ah hian Art & Culture Department Deputy Director Lalchuailova chuan he hun hmangtute chu chibai bukin, hetiang hun Neihloh khuaa buatsaih a ni chu lawmawm a tih thu a sawi a. Mizote chu Pathian in Culture hran neia a duan kan nih thu sawiin, Western Culture te, Korean Culture leh Culture dang te pawhin na takin min rawn hrut chang awm mah se kan Mizo Culture kan vawn nun reng a pawimawh thu a sawi a. Mizo thalaite kawng hrang hrangah hmasawn kan ngaihna te sawiin, Zonun zemawi chawisanna kawngah te, chhiatni a kan intawiawmna leh aia upa zahna kawngah pawh tan kan lak lehzual a ngaih thu a sawi a. Kan Kristianna leh kan Mizo nun zemawi hi kan dinchhuah tir chuan ram nuam kan siam thei tih sawiin, mahni hmasialna dahthain tlawmngaihna te, midang tana inpekna leh tanpui ngaite tanpuitu nih tum zel turin a chah bawk.
Nimin-a Cultural Meet hi Neihloh Branch YMA President Hranghmingthanga Hmar chuan kaihruaiin Neihloh VCP Lalawmpuia pawhin thu a sawi a, Neihloh leh a chhehvel khaw hrang hrang atangin YMA Branch te leh Zirna In te bakah MCO leh Serchhip Sub-Hqrs. YMA Cultural Troupe ten Hnam Lam chi hrang hrang an entir a, zai chi hrang hrang ngaihthlak a ni bawk.
Neihloh khua hi Serchhip District-a awm niin an khua ah hian In 74 a awm mek a, YMA Member mipa 122 leh hmeichhia 120, an vaiin 242 awmin hetianga Mizo Hnam lam leh zai hrang hrang entirna hun hi an khua ah buatsaih a ni ngai lo tih an khaw mi te chuan an sawi a. Nimin a he Cultural Meet buatsaih pawh hi khawtlang in an hlutin nileng in hun an hmang a ni.