Shalom Special School te CM in Bus a hlan
He Bus thar inhlanna hun hi New Serchhip Venglai a Shalom Special School tual-a neih a nih hnuah a lawmna Inkhawm tawi chu New Serchhip YMA Hall-ah neih zui a ni a, Chief Minister chuan sawrkar in rualbanlote zirna lama ngaihtuahna a sen mek thu sawiin, “Heng kan unaute tana insengso a, theihtawp chhuah thin mi tam tak kan nei hi Mizoram kan vanneihna a ni,” a ti a. Shalom Special School pawhin School building thlenga sak saktu an nei chu ropui a tih thu sawiin, 19th Assam Rifles te chungah lawmthu a sawi a. “Pathian in hmangaihtu tha tak tak a pe thin che u a, a pe zel ang che u tih pawh ka ring. Vawiina kan rawn hlan che u Bus thar pawh hi sawrkar sum engmah seng lovin, rualbanlote hmangaihtu, in mamawhz ia hria, ka thianten an thawhkhawm atanga an lei a ni a. Kei hian a hming ka tum ve ringawt mai a ni,” tiin Bus thar nen ngei Chief Minister chenna tlawh leh turin a sawm nghal bawk.
Bus thar lawmna hun hi Shalom Spastic Society Chairman Upa Vanlalchhunga chuan kaihruaiin an School chanchin tlangpui a sawi a, Captain Vanlaltharzuala chuan hunserh hmangin lirthei thar Pathian hnena hlanna hun a hmang bawk a ni.
Shalom Special School hi kum 2005 a mi thahnemngaite din a ni a, a tirah Serchhip AOC Veng-ah mi building luaha awmin hemi hnu hian New Serchhip Venglai-ah an School Building tur hi Assam Rifles ten sain kum 2011 khan an luah a, hei bakah hian ei leh in tur thilte pein mi tlawmngai ten sum leh pai hmangin an tanpui bawk a, Zirtirtu pathum ten hlawh nei lovin zirtir hna an thawk mek a, Zirlai 32 neiin anmahni in thil chi hrang hrang siamin sum an tuak thin bawk a ni.
Comments
Post a Comment