Naktuk-a Mega Mock Drill neih tur atan Serchhip-ah inbuatsaihna thlirlawk a ni
State Disaster Management Authority (SDMA) kaihhruaina hnuaia Mega Mock Drill neih tur atana Table Top Exercise hi Mizoram Legislative Assembly Conference Hall-ah neih niin District tin atangin District Disaster Management Authority (DDMA) te chu Video Conference kaltlangin an tel a. Serchhip District-ah pawh District Bawrhsap Paul L.Khuma hovin Serchhip DC Meeting Hall-ah he programme hi mi pawimawhten an lo zawm a. He hunah hian Disaster Management and Rehabilitation Department changtu Secretary K. Lalrinzuali chuan Table Top Exercise hman a nih chhan te, November 14-a Mizoram pum huapa State Level Mock Exercise neih tur a tul em em nachhan leh pawimawhna te a sawi a. Lt. General Syed Ata Hasnain, PSVM, AVSM, SM, VSM (Retd.), Member, NDMA, Government of India hnen atangin thuchah tawi ngaihthlak a nih hnuah Presentaton hrang hrang thlirho a ni bawk.
Video Conference neih zawh hnu hian Serchhip DDMA Member te bakah he Mock Drill a tel tur Department hotute leh a kaihhnawih mi pawimawh zawng zawng te chuan thutkhawm nei chhunzawm nghalin Serchhip District-a Mega Mock Drill neih dan tur chipchiar an rel a ni a. Bawrhsap Paul L. Khuma chuan chhiatrupna a lo thleng a nih pawhin inzirlawkna leh inbuatsaihna nasa tak kan kalpui chuan a tak tak a lo thleng palh a nih pawhin kan buai lo anga, kan tih leh tih loh tur kan chiang dawn a ni, a ti a. Mock Drill hi nunchan zirna ni rih mah se, a tak tak anga kan hmachhawn a tul a ni, a ti bawk.
Ruahman lawk ang chuan November ni 14, 2024 zing dar 10:00-ah Siren tihrik a ni dawn a, hetah hian chhiatna chi hrang hrang lo thleng anga changin, Serchhip Auditorium building a chim anga, Serchhip District Hospital Building thenkhat a chim anga, Hmar Veng-ah leimin nasa tak a thleng anga, Presbyterian English School-a chim a nga, Tlangnuam-ah 11kV Line a chhia anga, Bilzel-ah ramkang a thleng dawn bawk a ni. Heng hmun hrang hrangah hian chhanchhuah leh chhawmdawl hna thawh dan chu a tak anga thawh chhunzawm nghal tur niin chhanchhuahna hmanraw hrang hrang dahkhawma leh lakkhawmna hmun Staging Area atan Leisekawt Field hman a ni dawn a, Relief Camp atan Serchhip Indoor Stadium hman a ni bawk ang.
Nimin-a thutkhawm ah hian Team hrang hrang te leh Department te mawhphurhna chipchiar taka sawiho a ni a. Mock drill-a thil thlen dan tur a chinchhuakin enlawk a ni.
Comments
Post a Comment