Serchhip khawpui ah Mega Mock Drill neih a ni
Serchhip District Disaster Management Authority (DDMA) in ruahmanna a siam anga Mega Mock Drill hi nimin chawhma dar 10:00 khan neih tan niin zing dar 10:00-ah chhiatna chi hrang hrang thleng anga changin District Emergency Operation Center (DEOC)-ah Incident Response System (IRS) tihnun nghal a ni a. Leimin nasa tak thleng anga report siamin Bawrhsap leh Responsible Officer (RO) chuan Incident Commander tur ruatin DEOC-ah DDMA Member te leh Incident Response Team koh-khawm nghal an ni. Hemi hnu hian In chim leh leimin te, ramkang leh kangmei chhuak report te siamin heng thil thlenna hmun hrang hrangah hian Police, Fire & Emergency Services, H&FW, MPRO, Quick Response Team, PHE, Power & Electricity Department, BSF, Assam Rifles, Ex-Servicemen, PES zirtirtu leh zirlai te, Adventure Club leh Department hrang hrang atangin Official te, VC, tlawmngai pawlte leh mipui mimir engemaw zat ten chhanchhuah leh chhawmdawlna hna thawh dan hi a tak angin an entir a ni.
Heng hmun hrang hranga Mock Drill neih zawh hnu hian Serchhip Pisapui Hall atangin State Level buatsaih tlirletna (debriefing) hun chu Video Conference kaltlanga chhim zui a ni a. He hunah hian Bawrhsap leh RO chuan report pein Serchhip District inpuahchahna leh hmalak dan te tha an tih thu leh mawhphurtuten an chanvo tha taka an hlenchhuak ni a an hmuh thu an sawi a ni. Hemi hnu hian Bawrhsap ho hian Member kalkhawm ten tun tum Mock Drill an hmuh dan an sawiho zui nghal a. Felhlel lai leh siamthat ngai nia an hriat te siamthat dan tur leh hmasawn dan tur rawtna te an ngaihtuah ho nghal bawk a ni.