Serchhip District-ah ASF vanga chhawmdawlna dil an tam
Serchhip a AH & Vety Department in an chhinchhiahna atanga a lan danin nimin khan New Serchhip South-ah ASF vanga Vawk thi 4 awm lehin Chhingchhip-ah pahnih leh Khawlailung-ah pakhat a thi bawk a, heng bakah hian nimin vek khan Chhingchhip-ah hian hri leng avanga Vawk suat pakhat a awm bawk a ni. Heti hian kumin chhung hian Serchhip District-ah ASF vanga Vawk thi 3516 awm tawhin Vawk 7052 suat a ni tawh bawk.
Hetihlai hian kumin a ASF hri leng avanga Vawk thi te hnenah sawrkar in chhawmdawlna a pek dawn avangin October thla tawp thleng khan Serchhip District-a Vawk thi 2713 neitute chuan zangnadawmna dilna hi Serchhip-a DVO Office-ah an thehlut tawh tih Serchhip DVO Dr. H. Vanlalrawna chuan LENKAWL a hrilh a. African Swine Fever (ASF) hi Mizoram sawrkar in State Disaster-ah a puan tawh avangin ASF avanga Vawk chan te chu zangnadawmna pek an ni dawn a, zangnadawmna hi State Disaster Response Fund (SDRF) atanga pek tur niin, mahni awmna District theuha District Veterinary Officer (DVO) hnenah dil tur a ni a; DVO te'n ASF vanga thi ngei a ni tih an finfiah hnuah chhawm-dawlna dilna chu DC/District Disaster Management Authority (DDMA) Chairperson hnenah thehluh tur a ni a. Hriat theih chinah he ruahmanna hnuaia chhawmdawlna diltu hi Mizoram pumah chhungkua 4980 awm tawhin an Vawk chan chu 14,924 a ni a, tanpuina an dil hi Rs. 5,96,96,000/- a ni bawk.
SDRF kalphung angin ASF avanga Vawk thi te hi Vawk pakhatah Rs. 4,000 zel pek theih a ni a. Aizawl District tihloh ah Serchhip District chu dil tam ber niin Vawk neitu 1231 ten Vawk 2713 an chan avangin Rs. 1,08,52,000/- an dil a ni.