Serchhip-ah puakthei thil tam tham tak man a ni

Serchhip Police te leh 42nd Assam Rifles te tawngkawp chuan nimin khan Serchhip-ah puakthei thil thahnem tak an man.
Thudawn danin Serchhip Police te leh Serchhip-a awm 42nd Assam Rifles te hian an thudawn bawhzuiin nizan hmasa khan Serchhip Sailiamkawn-a Police Check Post-ah Dan phalloh-a thil phurh dapchhuah hna an thawk a, nimin zing dar 3:00 vel khan Aizawl atanga Thingsai pan tur TATA Yodha Truck pakhat atangin puakthei thil- Gelatin box 48, box pakhat a Gelatin tlawn 200 zel awm te; Detonator box 94, box pakhat ah Detonator 100 zel leh Safety Fuse Coil 5, Coil khat meter 375-a sei te an man ta a ni.

Heng puakthei thil kaihhnawih ah hian lirthei khalhtu Lalthanzama leh a fapa Vanlalmuan-awma, Thingsai khua nia insawi te chu man nghal an ni a, thubuai siam sak niin heng mite hian an thil phurh te hi Aizawl atanga lak niin Thingsai lama phurhchhoh tur a nih thu an sawi a, heng an thil phurh te hi tualchhunga hralhna anga chhutin Rs. 4,11,700/- hu vel nia chhut a ni.