Thlai hralh ah harsatna a awm loh nan inring tawh

Chief Minister Lalduhoma chuan thlai hralhah harsatna a awm loh nan sum an inring reng tawh tih a sawi.

Mizoram Agricultural Marketing Board in 'Bána Kaih Sensitization cum Consultation Meeting on Thlai Thar Market' niminpiah-a an buatsaih a hmanpuina ah Chief Minister chuan nikum tun ang huna an policy zawrh chu tunah chuan an kut-ah a awm tawh thu sawiin, “Tihlawhtling turin theihtawp chhuahin kan thawk thei ta. Thlai tharte tha taka hralh turin kawng tha a pawimawh a, thlai thar huna kawng tha nei hman turin rilru zawng zawng nen theihtawp kan chhuah,” a ti a. Thlai hralhtute'n harsatna an tawh lohna turin Support Price tur sum an inring reng tawh tih sawiin, “Thlai thar leitute'n min dawn hniam (bargain) lohna turin ruahmanna siam a ni,” a ti a; Mizoram leh Tripura ramri-a Langkaih lei dawh zawh hunah thawven khat a awm tur thu a sawi bawk.

Ban-a Kaih Scheme a hlawhtlin nan DC-te an pawimawh thu pawh Chief Minister chuan sawiin, “Bána Kaih Scheme tha taka kalpui a nih theihna atan DC zawng zawng training pek an ni tawh. CM Special Package dil an thahnem hle a, DC-te hnenah an thehlut mek a, endik nghal zel a ni,” a ti bawk.