Serchhip DC Office in Soft Skill training an nei
He Training Serchhip DC Pisapui Hall-a neih ah hian Bawrhsap Paul L.Khuma chuan DC Office a Officer leh Staff te thawhpui nuam a tih thu sawiin, an tihtur leh mawh-phurhna tha taka hlen thin mi an nih thu a sawi a. Chutihrual erawh chuan tute pawh intuaithar a, inzirthar ngai kan nih thu leh thlen chin atanga hmasawn tura intuaithar nachang kan hriat loh chuan kan hnathawh thin te ngaiah neiin, hmasawn chuang loa kalphung pangngaia kal pet pet reng theih a ni tih a sawi a. Hei vang hian Soft Skill leh Communication training an neih chu intuaitharna hun remchang a ni tih hriaa an thil zir te uluk taka vawnga a taka nunpui ngei turin a fuih a ni.
Bawrhsap chuan Office-ah thawhpuite nen chhungkua ang maia awmkhawmin an hun tam zawk an hman thu pawh sawiin, “Chuvangin thawhhona boruak tha kan neih a, thil tha zawk kan zir thar zel hi a tul a ni,” a ti a, “Kan hmanrua te tuaihriam nachang kan hriat loh chuan hmantlak loh kan ni thuai mai dawn a ni,” tiin, thiamna nei tura hmalakna chu sum khawhralna ni lovin, Office a thawktute tan mai bakah an rawngbawlsak sawrkar leh mipui tan hlawkna tha zawk an hmuh let ngei a beisei thu a sawi bawk.
Nimin-a Training-ah hian Soft Skills and Communication Certified Trainer Jacinta Colney chu Resource Person niin Serchhip DC Office a thawktu zawng zawngte an tel a. Office a thawhhona boruak tha siam dan te, pawn lam atanga dawrtu mipui mimirte dawnsawn dan te, hruaitu tha ni tura thil pawimawh te, hun vawndik leh time management te, harsatna a thlen thulha inremna kawng zawn dan te, sawrkar leh mipui rawng an bawlna kawnga thil thar tha zawk ngaihtuah chhuah dan te, hawihawmna leh awm dan mawi te leh mihring nunphung thil pawimawh chi hrang hrang te he hunah hian zirho a ni.
Comments
Post a Comment