P&E Serchhip Division-a thawktu ten vanduaina thleng thei laka fimkhur dan an sawiho
Bukpui P&E Rest House-a he Meeting hi Serchhip Power Division-a Executive Engineer, Er. Laldawngliana chuan kaihruaiin he hun hmanpuitu P&E Transmission Circle-a Superintending Engineer, Thanglura Sailo chuan thupui pawimawh tak tak zirhona nei tura he thutkhawm hi koh a nih thu a sawi a. Kumin a Electric accident thlen tam berna area an nih thu leh hei vang hian fimkhurna kawngah hma an sawn a ngaih thu sawiin, vanduaina tawk te chu Field a thawk, ban-a lawn thin te an ni tih a sawi a, hei vang hian he huna tel te chu thutkhawm an neih hma aiin an neih hnuah fimkhur tlang ngei tura an beisei thu sawiin, hna an thawhna ah hmanhmawh taka ti rum rum tur a nih loh thu te, hnathawktute chu an duh ber te an nih thu te leh a thiam ber ber te an ni tih a sawi a, heng bakah hian a fimkhur ber ni se an duh thu a sawi bawk.
He hunah hian Er. R. Lalremruati, JE (Electric) chuan Electric avanga vanduaina thleng thei leh hemi laka fimkhur a tulna hrang hrangte tarlangin, ani bakah hian Er. Lalhruaitluanga, SDO Serchhip; Lalthanfeli, EO-I leh Er. H. Zoramthanga, SDO ten thupui hrang hrang hmangin thu an sawi bawk a. Electric (Kawlthepha) chu mitin tana tangkai, kan mamawh em em leh a lo-a kan awm theih loh ni mah se chhiatna rapthlak tak thlen thei, a hmangtu leh a enkawltute nunna laksak thei a nih avangin electric avanga chhiatna lo thleng thin laka a hmangtute leh a enkawltute an him theih nan he hun hi buatsaih a nih thu a tarlang a. Electric avanga vanduaina thleng thin leh a thlen chhan hrang hrang te sawiho niin In sak leh thildang in Electric line hrang hrang rawn hnaih thin te enfiah hna tawkin Quarter tina report pe turin ruahmanna siam a ni a. Hei bakah hian Electric Line siam avanga vanduaina thleng thin laka fimkhurna tur hrang hrangte sawiho a ni bawk.
He huna tarlan a nih danin kum 2024 chhungin Electric accident tum 35 thleng tawhin heng zinga tum 9-ah nunna chan awmin tum 26-ah nunna chan an awm lo a, sumfai cheng nuai 115.44 sen a ni a. Serchhip Power Division hnuaiah Electric accident tum 6 thlengin nunna channa thleng tum hnih leh nunna chan awm lohna tum 4 te a ni a. Heng bakah hian an Circle hnuaiah hian 11kV Line Clearance kaihhnawih ah tum 3 vanduaina thleng tawhin thawktute fimkhur tawk loh avangin tum hnih a thleng bawk a. Inverter atanga Electric kalsual te, LT ban-a puan phona hrui thlun leh LT ban phun fimkhur loh vanga vanduaina thleng tum khat theuh a awm bawk a ni.
Comments
Post a Comment