Serchhip-ah 100% LPG Home Delivery lawm a ni; Ration card Sen sawrkar in a siam dawn

Serchhip Town chhunga eirawngbawlna Gas sem zawng zawng Home Delivery kalpui anih lawmna hun chu nimin khan Serchhip-ah neih a ni a, he hun hi Supply Minister B. Lalchhanzova chuan khuallian niin a hmanpui a ni.
Serchhip Town chhunga 100% LPG Home Delivery kalpui lawmna hun Serchhip DC Pisapui Hall-a neih ah hian Supply Minister chuan Aizawl-a an kalpui hleihtheih loh LPG Home Delivery Serchhip-a tha taka kalpui a ni thei chu ropui a tih thu sawiin, midang zirtirtu ni zel turin a chah a. Serchhip-ah District Consumer Association tha tak a ding chu lawmawm a tih thu sawiin, “An hmalakna a fakawm tak zet a ni,” a ti. Supply Minister chuan Ration Card ennawn hna thawh mek a nih thu pawh sawiin, a buaipuitute lam atang chuan na deuh taka hmalak an tum thu a sawi a, Ration Card Var in buhfai kg 1 cheng 30-a an leina tura a mawhphurtu ber chu anih thu a sawi bawk. Card pawl leh card eng-a awm awm tak, mahse a awm thei chin bitukin a pelh tawh si avanga leng ta lo engemaw zat an lo la awm thu sawin, “Chuvang chuan mi nuai 1 te tan kg 1 cheng 20-a ration buhfai an khul theihna tur Special Ration Package chu buatsaih a nim” tiin Ration Card sen an hman dawn thu a sawi bawk.

Supply Minister chuan mipuite chu kan vai hian kan ram tan rohlu tak kan ni theuh tih in hre thar tura chahin, “Pawimawh ber bik a awm thei lova, kan vaia kan tanrual hian kan District leh kan ramin hma a sawn zel theih nan kawng hrang hrangin tangkaina a nei a ni,” a ti a. Kan thil tih zawng zawng hian a tum chu mipuite hmakhua a ni tih hre tur leh tute emaw tal tan tangkai nih tum theuha kan ko-a tla kan mawhphurhna te tha taka kan hlen theuh a tul thu a sawi a. “Kan vai hian bumna tawk thei vek kan ni a, chung hunah chuan Consumer pawl chak tak kan mamawh a ni. Food, Civil Supplies & Consumer Affairs Department chuan Consumer Association hi kan thawhpui leh kan hmanraw pawimawh tak an ni a; sawrkarin tih dikloh a neih pawh min khalh ngil thuaitu tur an ni a, tha takin kan thawkho zel dawn a ni,” a ti bawk.

Nimin-a he hun hman hi Serchhip District Consumer Association Vice President RL Chhuanawma chuan kaihruaiin Food, Civil Supplies & Consumer Affairs Department Director Saizikpuii, Serchhip District Deputy Commissioner Paul L. Khuma, Mizofed Chairman Rothangpuia leh Mizofed Serchhip Manager Vanlalsawma Vuangtu ten thu an sawi bawk a. SDCA Secretary Laldinpuia chuan Report pein SDCA ten eirawngbawlna Gas buk dik taka mipuiin an lak theih nan hma an lak thin thu leh Home Delivery hi Gas buk dik leh tling tha mipuiin an dawn theihna tha a nih avangin Serchhip P&E Veng atanga bul tan in, May ni 10, 2022-ah Home Delivery puitling ah puan a ni ta a; Serchhip-a Veng hrang hrang 17-ah Delivery 100% kalpui a lo ni thei ta chu lawmawm an tih thu leh hetiang hlawhtlinna an chan theih chhan chu Supply Department, Mizofed leh Legal Metrology Department te nen thawhhona zar a nih thu a sawi bawk.