Ruihhlo do hna thawktu pawl hrang hrangte hnenah ruihhlo dona tur sum semchhuah a ni

Mizoram-a ruihhlo do hna thawktu Agency hrang hrangte hnenah nimin khan Ruihhlo dona tur sumfai semchhuah a ni.

Working Committee on Ruihhlo Do kaltlanga ruihhlo dona sum semchhuahna hun Aizawl-a Excise & Narcotics Conference Hall-a hman ah hian Excise & Narcotics Department changtu Minister Lalnghinglova Hmar chuan kalkhawmte hmaah lawmthu leh fuihna thuchah sawiin, tlawmngai pawl hrang hrangte nena sawrkar thawhhona tha tak chu lawmawm a tih thu leh chhunzawm zel tlak ni-a a hriat thu a sawi a. Sawrkar, tlawmngai pawlte leh Kohhrante chu tun aia nasaa an tanrual theih phawt chuan Mizoram-a ruihhlo chu tihtlem theih nia a hriat thu a sawi a. Ruihhlo donaa sawrkar tha tichak tura sawrkar hmalaknate pawh tarlang nghalin, Department tana lirthei ke pali nei 14 leh Two Wheeler 4 sawrkarin a pek thute, thawktute pawh a theih ang anga an inlak belh dante leh District thar pathuma Excise Office a rang lama hawn a nih tur thute a sawi a. Kalkhawmte chu phur lehzuala ruihhlo dona kawnga tan la zel turin a chah nghal bawk a ni.

Nimin-a he hun hman hi Commissioner of Excise & Narcotics leh Working Committee on Ruihhlo Do-a Member Secretary Z. Lalhmangaiha chuan kaihruaiin kalkhawmte lawmna thu a sawi a. Tlawmngai pawl thenkhat; Mara Thytlia Py (MTP), Young Lai Association (YLA) leh Central YMA hruaitute atangin lawmthu sawina leh an hmalakna thenkhat te ngaihthlak nghal niin, Fund hi sem nghal a ni.

Tun tumah hian Ruihhlo dona sum hi a vaiin cheng vbc. 2 (hnih) semchhuah niin Supply Reduction atan Mizoram Police leh Central YMA chu cheng nuai 35 ve ve hlan niin Excise & Narcotics Department chu cheng nuai 30 hlan an ni a. MTP leh YLA te cheng nuai 5 ve ve hlanin FDA chu cheng nuai hnih, a vaiin cheng nuai 112 semchhuah a ni a. Demand Reduction-a hmalakna atan SW&TA-ah cheng nuai 40 leh MSACS-ah cheng nuai 5, a vaiin cheng nuai 45 semchhuah a ni a, District Level-a hmalakna atan Aizawl District-ah cheng nuai 2, Lunglei, Siaha, Champhai, Kolasib, Mamit leh Serchhip District-ah cheng nuai 1.5 theuh leh District dang pali-ah cheng nuai khat theuh, a vaiin cheng nuai 15 hlan an ni a. State Level Committee on Ruihhlo Do-ah tul hrang hranga hman turin cheng nuai 20 leh Mass Media Campaign atan cheng nuai 8 pek a ni bawk.