Prime Minister in Mizoram-a EMRS pahnih hawngin School 5 dinna tur lungphum a phum bawk

Prime Minister Narendra Modi chuan nimin khan ramchhunga Eklavya Model Residential School (EMRA) 10 hawngin School 25 atan lungphum a phum a, School hawn zingah Mizoram atangin pahnih telin School 5 lungphum phum a ni bawk.

Prime Minister hian Birsa Munda piancham vawi 150-na denchhenin nimin khan Bihar-a Jamui atangin Virtual Mode-in ramchhunga Eklavya Model Residential School (EMRA) te hi hawngin heng zingah hian Mizoram atangin Bilkhawthlir leh Noaohtlah te chu a tel a, heng School hawnna hun hi Kolasib DC Office Hall atangin leh Siaha-a DC Mini Conference Hall atangin lo zawm a ni. EMRS Bilkhawthlir-ah hian Academic Session 2024-2025 atangin zirna kalpui tan a ni a, tun Session atan Class-VI leh Class-VII chauh hawn rih a ni a, Class XII thleng hawn belh tura ruahman a ni. Tunah hian zirlai hmeichhia 54 leh mipa 43, an vaiin zirlai 97 an awm mek a. Thawktu Teaching Staff leh Non-Teaching Staff an vaiin 16 an awm mek a ni. EMRS Noaotlah hi kum 2019-2020 khan sanction niin, kumin 2024 khan zirna kalpui ta a ni a, Class VI leh VII Double Section-a bul tanin Zirtirtu Teaching Staff paruk (6) leh Non-Teaching Staff 8 an awm mek a. Zirlai mi 118, mipa 59 leh hmeichhia 59 an awm mek a ni.

Prime Minister hian nimin vek khan ramchhunga EMRS 25 dinna tur lungphum a phum bawk a, heng zingah hian Mizoram atangin panga (5) a tel a, heng te hi Khawzawl, Sawleng, Khawbung, Lungsen leh West Phaileng khuaa dinna turte a ni.

National Education Society for Tribal Students (NESTS), Ministry of Tribal Affairs in India ramchhunga Scheduled Tribe zirlaite’n zirna chhenfakawm tak an neih theihna tura a hmalakna pakhat, Eklavya Model Residential School (EMRS) hi Mizoram-ah Social Welfare & Tribal Affairs enkawlna hnuaiah kalpui niin, Mizoram EMRS Society in a enkawl a. India danpui Article 275(1) behchhan in EMRS hi Tribal mipuite chawnkanna atan duan niin kum 2018 - 2019 Central Budget ruahmanna angin State leh UT chhunga Development Block tina mipui 50% Tribal Category awm tlinna hmunah emaw Tribal mipui 20,000 awm tlinna Block-ah te din tur a ni.