Mizoram-ah PM Vishwakarma kalpui mek a ni

Sawrkar laipuiin kutthemthiamte leh thilsiam thiamte tanpuina leh khaichhuahna atana a duan PM Vishwakarma chu Mizoram-ah pawh kalpui a ni a, kum khat chhunga dilna lut tawh zawng zawng chu 2,109 a tling.

PM Vishwakarma Consultant Betsie K. Vanlalpeki chuan he hmalakna in a tum ber chu kutthemthiamte thiamna hriatpui a, tanpui a ni ber tih a sawi a. Hetah hian India ram puma kut themthiamte tan Trade 18 thlanchhuah a ni a, heng zingah hian Mizoram-ah Trade 3 – Mistiri, Puanthui leh Lumeh thlang chu an tam ber a. He tanpuina dawng thei te hi kum 18 leh chunglam zawng te an ni ang a, an Trade thlan hmanga mahni-a eizawng lai an ni tur a ni. Heng Trade thlang te hian Loan chhawng hnih- cheng nuai 1 an dawng phawt anga, a dawtah cheng nuai 2 dawng thei leh tura ruahman a ni a. Loan hi a pung a tlem hle a, zaa 5 niin Loan la duh te tan dahkham a ngai lo a, Basic Training an kaltlang erawh a ngai phawt dawn a. An training chhung hian ni khatah stipend Rs. 500/- an dawng thin bawk.

Betsie K. Vanlalpeki chuan he Scheme hi Mizoram-ah chuan Commerce and Industries Department a MSME in an kalpui mek tih sawiin, a ngaihven duh tan mahni khua a Common Service Centre (CSC)-ah te zawhfiah theih reng a nih tih thu a sawi a, he Scheme hi kum 5 chhung, kum 2028 thleng kalpui tur a nih avangin dil duhte tan ngaihven theih reng a nih bakah he Scheme chuangchang hi inhrilh pung a, a tam thei ang berin tanpuina dawng se tih chu sawrkar duhdan a nih thu a sawi bawk.