PM Vishwakarma hnuaia Serchhip District-a training chhuak mi 61 hnenah Certificate hlan a ni

PM Vishwakarma hnuaia Serchhip District chhunga Thing mistiri (carpentry) training chhuak mi 61 hnena Certificate hlanna hun chu nimin khan Serchhip DC Pisapui Hall-ah hman niin he hun hi Bawrhsap Paul L. Khuma chuan a hmanpui a ni.

Serchhip District-a PM Vishwakarma kalpuitu Medhavi Foundation-a Centre Coordinator Lalbiakdiki Ralte kaihhruaia he hun hman ah hian Bawrhsap chuan Mizoram District 11 zingah PM Vishwakarma hnuaia Training chhuak te hnena Certificate sem thei hmasa ber District kan ni chu Serchhip District mipuite, DC Office a thawktute leh Serchhip District-a he Scheme kalpuitu Medhavi Foundation te thahnemngaihna vang a nih thu sawiin, District te zinga hmahruaitu kan ni thei chu a lawmawmin a chhuanawm tak zet tih a sawi a. Sawrkar in khua leh tui te chawikanna atan ngaihtuahna nasa tak sengin hemi atang hian PM Vishwakarma hi a lo chhuak ta tih sawiin, “Theihtawp kan chhuah chuan min chawi kangtu a ni thei a ni,” a ti a. Training chhuak te chu tuna Certificate an dawn ah duhtawk mai lova thiamna sang zawk leh an thil siamchhuah te pawh Mizoram leh India ram mai ni lo, khawvel huap pawha hralhchhuah kawngah tan lak zui a tul thu a sawi a. Hlawhtling turin anmahni ah sawrkarin beiseina sang tak a nei tih sawiin, an beisei leh hmathlir te a tak thlenpui ngei turin training chhuak te leh PM Vishwakarma kaltlanga hamthatna dawngtute a fuih a ni.

Nimin-a he hun hman ah hian Serchhip DC Office-a SDC Dr. C. Vanlalchhanhimi chuan Serchhip District-a PM Vishwakarma hmalakna sawizauin he hmalakna hi India ramah kum 2023 khan tlangzarh a nih thu leh Kutthemthiam te thiamna belhchhah a, an theihna tipunsakin, quality tha zawk an siam theihna tura tanpui chu a thiltum a nih thu leh Trade chi 18 a awm thu a sawi a. Serchhip District chhunga VC zawng zawngte he Scheme hnuaia an inziahluh tawh thu te, dilna thehluttu mi 2582 awm tawhin dilna lut te hi Nodal Department - Commerce and Industries chuan lo thlifimin DC Office in a pawmpui hnuah State-ah thehluh leh thin a nih thu a sawi a. Tunah hian a hmasa ber atan Carpentry Training hi Batch 2 a kalpui niin Training chhuak mi 61 zingah hian hmeichhia pakhat a tel a ni.

India sawrkar in thiamna nei (Artisan) te’n eizawnna bul an tan theih nan Scheme thar PM Vishwakarma hi September 2023-ah tlangzarh niin he Scheme hnuaiah hian thlanchhuah thiamna chi hrang hrang nei (artisan) te chu Certificate leh ID Card pek tur niin, hmanrua (Tool kit) Rs. 15,000/- man e-voucher dawn theihna a nih bakah, Loan cheng nuai 3 thleng za zela 5-a pung leh dahkham awm lovin an puk thei anga, Training hun chhung hi ni 5-7 niin, Training chhung hian nitin stypen Rs. 500 an dawng bawk ang.