Nov. 14-ah Mega Mock Drill

Karleh Ningani, Nov. 14, 2024 khian Serchhip-ah Mega Mock Drill neih a ni dawn a, hemi chungchang hi nimin khan Serchhip-ah District Bawrhsap hovin sawiho a ni.

Tun tuma Mega Mock Drill neih tur hi Mizoram puma neih tura ruahman niin Serchhip-ah pawh khawpui chhung hmun hrang hrangah chhiatna lo thlen tulha chhan-chhuah leh chhawmdawl hna thawh dan chu a tak anga changa entir a ni dawn a. Ruahman lawk ang chuan Serchhip Town chhungah Serchhip Auditorium, Serchhip Hmar Veng, Serchhip District Hospital, New Serchhip South leh Presbyterian English School-ah te neih a ni dawn a. District Hospital leh Presbyterian English School-ah te hian building chim lem chan a ni ang a, Serchhip Hmar Veng-ah leimin leh New Serchhip South-ah ramkang avanga chhiatrupna thleng hmachhawn dan nunchan zir a ni anga. Heng bakah hian leimin avangin 132 kV line Transformer chim chhe vek tur leh DC Tlang-a Reservoir tui litre 2,00,000 dahkhawlna pawh chim chhe vek anga lemchan a ni dawn bawk a ni.

Chhanchhuahna hmanraw lakkhawmna leh dahkhawmna hmun tura ruat Staging Area atan Leisekawt Mual hman a ni dawn a. Zing dar 10:30 ah Siren tihrik a ni dawn a, hemi hma Nov. 12 khian Table Top Exercise chu State Disaster Management Authority leh National Disaster Management Authority te kaihhruaiin neih a ni ang.

Serchhip DDMA Chairman leh Bawrhsap Paul L.Khuma chuan chhiatrupna a lo thlen thulha inrinlawkna leh hmachhawn dan tur inbuatsaih hi District thuneitu zawng zawngte tihtur a ni a, Mock Drill neih tur pawh lemchanna ang chauh ni rih mah se a tak taka thleng ang ah ngaia tihtakzeta an mawhphurhna theuh hlenchhuak turin kalkhawm te a sawm a. Chhiatrupna a lo thlenin District Administration chauh ni loin Department tin hotute an pawimawh em em dawn a, thawhhona tha tak nen Mega Mock Drill kan neih theih nan inbuatsaih theuh turin a chah bawk a ni.