MSU President Bail dilna Vawiin ah ngaihtuah dawn

Mizo Students Union (MSU) General Hqrs. President Samuel Zoramthanpuia chu man-a Central Jail-a dah a nih hnuah Vawiin hian Bail a dilna ngaihtuah a ni ang.

Tarlan tawh angin Samuel Zoramthanpuia hi Zirtawpni khan Anti Corruption Bureau (ACB) ten manin hemi hnu hian Aizawl Police Station-a Duty ten an man leh a, ACB-in MSU President an man chhan hi kum 2022-a 'Project Mizoram (Covid-19 Relief Fund)' hminga MSU General Hqrs. in Health and Family Welfare Department kaltlanga cheng nuai 50 an dawn hman anih dan leh Myanmar raltlante hriselna kawnga buaipui thintu pawl Chin Health Organisation kaltlanga MSU-in damdawi leh Medical Equipment chi hrang hrang leina tur sum an hmuh Rs. 15,13,162 hman danah thil felhlel a awm tih complaint an hmuh kal zelah a ni a. ACB in complaint an dawn chungchang ah hian sawrkar chuan kumin September 9 khan Preliminary Enquiry tih phalna ACB a pe a, ACB Preliminary Enquiry Report-in a chunga tarlan thilah hian thil felhlel a awm tih a finfiah anih avangin Regular Case siam phalna chu ACB-in sawrkarah a dil leh a; Sawrkar phalna in ACB te chuan October ni 17 khan ACB Police Station Case No. 8/204 chu ziaklutin an chhuizui nghal a. An chhuizui chinah chuan kum 2022-a MSU General Secretary nihna chelhtu, Samuel Zoramthanpuia chu pawisa tichingpentu ber leh mawhphurtu ber a ni tiin November ni 8 khan an man ta a ni.

Aizawl Police Station-in an man chhan hi hnamdang company-a thawk MSU Pisa-ah hrengin vauna hmanga pawisa chhuhsak thubuai-ah a ni a, He thil thlen lai hian Samuel Zoramthanpuia hi MSU President a ni tawh a ni.

Samuel Zoramthanpuia chuan Anticipatory Bail a lak loh avangin man a nih hnuah Central Jail-ah dah a ni a, Bail a dilna chu Vawiin hian Court in a ngaihtuah dawn a ni.