OMB-a sum puk mamawh thut vang a ni lo tih sawi

Adviser to Chief Minister (Finance) TBC. Lalvenchhunga chuan Open Market Borrowing (OMB) atanga thlatin-a sum an puk chu mamawh thar thut vanga puk a ni lo tih sawiin, Budget-a dah sa a nih thu a sawi.

Tunhnaia Mizoram sawrkar sum dinhmun chungchang a sawina ah Adviser to Chief Minister (Finance) TBC. Lalvenchhunga chuan kumin chhunga leiba tello-a Mizoram sawrkar sum hmuh tawh tawh chu cheng vbc. 4093.67 a nih thu leh Budget Estimate atanga zaa 33% hmuh ni tawhin, nikum tun ang hunah zaa 27.97% hmuh a ni tih a sawi a. Kumin ah Chhiah atanga sawrkar sum hmuh chu cheng vbc. 2834.08 niin beisei zat atanga 38.24% hmuh a nih tawh thu leh nikum-ah tun ang hunah khan beisei zat 36.51% hmuh a ni tih a sawi a.

Sawrkar kum kal meka sawrkar in sum a puk tawh zat chu cheng vbc. 1058 a nih thu leh kumin Financial Year a puk tura beisei zat atangin 77% puk a nih tawh thu sawiin, nikum tun ang hunah khan cheng vbc. 1871 lpuk tawhin hei hi sum puk beisei zat atanga za zel-a 147.22% a nih thu a sawi a, nikum aia sum puk tlemna chu cheng vbc. 800 chuang zet a ni tih TBC. Lalvenchhunga chuan a sawi a. Nikum tun ang hun (thla 6)-ah cheng vbc. 119 lai leiba tlingkhawm sum lu atanga a pung ringawt pek a nih thu leh thla 5 chhung khan cheng vbc. 13 chauh a pung hi rulh a ni tih pawh sawiin, “Kumin ah April atanga September thleng hian sum lu atanga a pung tlingkhawm cheng vbc. 198.29 zet sawrkar chuan a rul der tawh a ni,” a ti bawk.

Hei bakah hian Adviser to Chief Minister (Finance) chuan hmasawnna ruhrel dinna bikah nikum tun ang hun, thla 6 chhung khan cheng vbc. 4 chauh hman a nih laiin kumin ah chuan cheng vbc. 88 pekchhuah hman a nih thu leh Public Accounts atanga sum pekchhuah tawh zat hi April ni 1 atanga October thla thleng khan cheng vbc. 1024.07 a tling hman tih a sawi a, “K-Deposit pawh cheng vbc. 424.26 zet chhuah a nih tawh bakah sawrkar hnathawk GPF leh Retirement Benefits Pension chhuah tawh zat hi cheng vbc. 599.82 a tling hman tawh bawk a ni,” a ti a. Open Market Borrowing (OMB) atanga thla tin sum sawrkar in a puk chu Budget-ah dah sa thlap a ni tih sawiin, “Mamawh thar thut vanga puk ni lovin kan sum hmuh a hnar in a daih loh hmasawnna ruhrel dinna tur leh leiba sum lu rulhna tur atana puk tura ruahman a ni a. Kumin chhung hian leiba sum lu ringawt pawh vbc. 460 leh a pung vbc. 604 te rulhna tur Budget pass vek a ni,” a ti bawk.

ZPM Party chuan Budget vawi khat pawh la pharh ngai lo ten Mizoram sum an enkawl ve chinah hmasawnna thar kan hmu nia sawiin, lawmawm an tih thu thuchhuah siamin an tarlang bawk a ni.