CM hovin Departmental Review Meeting neih a ni

Minister of State Prof. Lalnilawma enkawl Department- Horticulture, Rural Development leh PHE Department-a hnathawh hrang hrangte thlirletna hun chu Zirtawpni khan neih a ni a, Chief Minister Lalduhoma chuan he hun hi a telpui a ni.

Secretariat Conference Hall-a he hun hman ah hian Horticulture Department hmalakna en hmasak ber niin Handholding Scheme hnuaia thlai thar lei tur thlanchhuah pali zinga pathum hi Horticulture hnuaia mi a nih anga an inbuatsaihna leh an hmalakna dang te chipchiar takin tarlan a ni a. Horticulture Department hian an hmalakna zawng zawng Handholding Scheme hnuaia luhpui (converge) vek a nih tur thu tarlan niin kum khat kalta chhung khan loneituten Dragonfruit atangin cheng vbc. 6.96, Balhla atangin cheng vbc. 4.17, Lakhuihthei atangin cheng vbc. 2.52, Tomato atangin cheng vbc. 5.74, Dawnfawh atangin cheng vbc. 3.49 leh Zikhlum atangin cheng vbc. 6.57 vel an tharchhuak niin an sawi.

Rural Development Department hnuaiah Programme lian tham panga an thawh mekte tarlan niin tun sawrkar kum kal meka ni za inhlawhna an kalpui dan te, Project Rotling an kalpui mek dan te, Social Audit Unit hmalak dan te, MzSRLM hmalakna te, SIRD & PR hmalakna te, BADP hmalakna te, RD Department dinhmun te, Vibrant Village Programme lokal tur te, RMIS leh an hnathawh dang te chu chipchiar taka thlirho a ni.

Public Health Engineering Department hmalakna ah JJM hnuaiah Water Supply Scheme 852 kalpui niin an zinga 657 chu Gravity hmanga lak a ni a, 188 hi Solar Pump niin Grid Power Pump 7 a awm bawk a. Heng zinga 832 hi Physical complete tawh niin hna kal mek 20 an la nei a. NABARD Fund atangin Water Supply Scheme kal mek 11 an nei bawk. SASCI hmanga hmalakna te, NESIDS Fund hmanga hnathawh mek te, Aizawl, Lunglei, Mamit leh khawpui danga tuilak hna an thawh mek te, Tawitlang tuihna Gravity hmanga thawh mek te, Swachh Bharat Grameen hmalakna tar tarlangin, Cyclone Remal an tawrh nasat thu leh Aizawl tuilak pawhin ngai a la awh theih loh thu an sawi bawk.

He thlirhona hunah hian Chief Minister Lalduhoma chuan Department te hna thawh tha lo emaw, an chak lohna hmuhchhuah tuma Review Meeting ko an ni hran lo tih sawiin, Department te hmalak dan hriatpui a, thawhhona tha zawk neih leh kan harsatna tawh mek te inhriat sakna atan te, hmasawnna chak zawk a awm theih nana ti an nih thu a sawi a. Hetianga thlirhona hun hi buatsaih an tumna a rei tawh thu leh a bul an tan thei chu lawmawm a tih thu leh hlawk a tih thu a sawi bawk.

Minister Prof. Lalnilawma pawhin Chief Minister-in a lo sawi tawh thin angin Review Meeting hmasa ber atana a Department enkawlte Chief Minister in a neihpui chu lawmawm a tih thu a sawi a. Rah tha a chhuah ngei a beisei thu a sawi bawk.