Assam ramri-ah boruak a ralmuang tih sawi

Mizoram leh Assam inrina hmun hrang hrang ah tunlaiin boruak a muanawm a, harsatna thleng awm lo mah se Mizoram Police te chu ngawrh takin an Duty mek a ni.

Mizoram leh Assam inrina leh buaina lo chhuah tawh thinna hmun, Thinghlun-ah Mizoram Police (4th IR) duty in Assam Police te pawh an duty a, “Boruak a ralmuang a, ramri-ah zalen takin kan inkalpawh thei a, harsatna thleng a awm lo,” an ti a. Bairabi lamah pawh ramri-ah boruak a ralmuang tih Bairabi OC chuan a sawi a, ramri hnaiha Assam-in Mandir sak an tumnaah tun thlengin Mizoram Police pali zel darkar 24 chhung an la duty chhunzawm a, Assam pawhin duty an la indah chhunzawm zel bawk a. Zophai lam pawh boruak a muanawm a ni.

Heng hmun pahnih bakah hian Mizoram leh Assam inrina Vairengte Aitlang leh Sabual hmunah te Mizoram Police-te ngawrh takin an la duty tih Vairengte OC chuan Zalen a hrilh bawk a, Assam lam pawhin duty an la indah a, boruak a ralmuang a, an hriat theih chinah harsatna thleng a awm lo niin Vairengte OC chuan a sawi. Hmundangte ang bawkin Mizoram leh Assam inrina pakhat, Saiphai lamah pawh boruak a ralmuang a, harsatna thleng a awm lo niin thudawn a ni bawk.