Bazar-a thil zuar ten leitha siam dan an zirho

Serchhip-a UD&PA Department chuan nimin khan Swachh Bharat Mission (Urban) 2.0 hnuaiah Serchhip Bazar Building-a thil zuartute tan Home Composting (Tawihthei atanga leitha siamchhuah) zirhona an buatsaih.

Serchhip-a UD&PA Department hian kumin August thla atang khan Home Composting Project hi kalpuiin bawlhhlawh tihtlemna tura hmalakna atan Serchhip Bazar-a chawhmeh leh thil dang zurtute tan tawih thei atanga leitha siam dan zirna hi nimin khan Serchhip Bazar-ah an buatsaih a, he hunah hian District Manager Lawmzuali chuan zirtirna pein Bazar-a chawhmeh zuar thin te chuan tawih thei bawlh-hlawh an neih tam avangin heng te hi leitha siamna atana tangkai taka hman a nih chuan bawlhhlawh a tlem phah dawn bakah sum lakluhna tha tak a nih dawn thu a sawi a. He huna tel te chu an thil zir te tangkai taka hman chhunzawm tum tura chahin, a theih anga an vil zui dawn thu a sawi bawk a ni.