Nagar Van Yojana (Urban Forest) hnuaia Entlang Social Forestry-a hmalakna CM in a hawng

Serchhip Sub-Hqrs. YMA ten an enkawl, Entlang Social Forestry-a Nagar Van Yojana (Urban Forest) hnuaia hmalakna te chu nimin khan Serchhip Bialtu MLA leh Chief Minister Lalduhoma chuan a hawng a, EF&CC Minister Lalthansanga pawhin he hun hi a hmanpui a ni.

Sawrkar laipui atanga sum hmuh cheng nuai 132 senga Nagar Van Yojana (Urban Forest) hnuaia hmalakna hawnna hunah hian Chief Minister Lalduhoma chuan he tlang leh a chhehvel ram hi Mizoram laili lo luah hmasatute hmunhma langsar, Bengkhuaia awp thin ram a nih vang ngawt pawh hian humhalh a phu tih a sawi a. Serchhip khawtlangin sawrkar chet hma kum tam tak atangin ramngaw humhalh hna an lo thawk tawh chu chhuanawm a tih thu leh a lawm thu sawiin, “Ramngaw nei tha ram leh khua apiang hi kan la awt dawn a. Vawiin-a bultantute hi mifing, hmatlir nei tha khua in ni,” a ti a. “Kumtin in lo leh huan hal la bansan thei chiah lo mah ila, hmasawnna hnate pawh thawk zel chungin; kan ram hmun tam tak hi tha taka humhalh kan tum dawn a. Environmental Balance (Zero emission) nei turin kal zel kan tum ang,” tiin ramngaw humhalh that a tulzia a sawi a. “Entlang ngaw-ah hian ramsa leh savate han tla dul dul mai se, a en turin kan pan ruih ruih mai ang. He hmalakna hian midangte tiharh se, a lo kalpui mek tawhte tiphur zual se, ram hmangaihna meichher hi Serchhip atang hian nasa takin lo eng chhuak thar se a duhawm hle,” a ti.

India State of Forest Report (IFSR) - 2021 in a tarlan danin, Mizoram pum zau zawng atanga 84.53% chu ramngaw (Green cover) in a la tuam thu leh hei hian ramngaw nei tha State anga min lantir laiin, ramngaw tha (Very Dense Forest) erawh chu 0.74% chauh kan nei tawh tih Chief Minister chuan sawiin, “North Eastern States zawng zawng zingah ramngaw tha (Very Dense Forest) nei tlem ber kan ni mek. Rambua (Open Forest) kan tih ang hi kan ngah em em ringawt mai a ni. Kan ram zau zawng atanga chhutin 56.68% lai hi rambua a ni. Kan ramngaw tha (Virgin forest/Very Dense Forest) chu Protected Areas (National Parks & Wildlife Sanctuaries) ah bak kan nei tawh lo tluk a ni,” a ti.

Addl. PCCF Kamal Preet-i kaihhruai he hunah hian Khual zahawm Environment Forest & Climate Change Minister Lalthansanga chuan Serchhip YMA te nena pheikhai rual taka Nagar Van an kalpui thei chu an lawm hle tih sawiin, “Vawiin a kan hmalakna chin hi a thawhkhatna chauh a la ni a, a thawh hnihna a lokal leh ang a, kan la chhunzawm zel dawn a ni,” a ti a. Ram leh hnam humhalh a tulzia leh chumi kawnga sawrkar hmalakna te a tarlang bawk.

Nagar Van Yojana hi sawrkar laipuiin khawchhunga ramngaw siam beihpui a thlakna niin June ni 5, 2020-a World Environment Day ni tak khan a puang a, a thawh khatnaah “Kum nga chhungin Urban Forest 200 siam nise, sum leh pai hi CAMPA (Compensatory Afforestation Fund Management and Planning Authority), CAF (Compensatory Afforestation Fund) atanga pek ni se, Pune khawpui chhunga Warje Urban Forest chu role model-ah hmangin khawpui dangah hmalak ve ni se,” tiin hemi hnuaiah hian he hmalakna hi kalpui a ni.

Nimin a he hun hman ah hian Thenzawl DFO R. Lalnungrenga chuan Technical Report pein Serchhip Sub-Hqrs. YMA President Kawlthuama pawhin thu a sawi a. Serchhip Entlang Social Forestry hi kum 1983 atang khan YMA te hian enkawlin tun tumah hian Hectare 50-ah hmalak a ni a. Thing engemaw zat phun belh niin Fur ruahtui luangral tur khawlna tur hmun ruk (6) siam a ni a, Check Dam engemawzat siamin, ke-a ramngaw fanna tur kawng te, Interpretation Hall te siam a ni a. Tlang chhipa Dil awmsa chu cheibawlin a chungah Lei mawi tak dawh a nih bakah hmun dang pakhat-ah Hruizen Lei dawh a ni bawk. Fencing te leh Gate pui pawh tha taka siam a ni bawk.