MSPMC in hnathawh 31 zet enfiah tawh

Kumin January ni 22-a din Mizoram State Project Monitoring Committee (MSPMC) chuan tunhnai thleng khan hnathawh mek 31 zingah hna thawh chhe tak tak engemawzat a hmuchhuak.

MSPMC-in hna hrang hrang a endik tawh 31 te hi Central sawrkar project 22, cheng vbc. 419.07 hu, State sawrkar hnuaia thawh Project 5, cheng vbc. 65.32 hu bakah hna 4, cheng vbc. 735.81 hu Central leh State sum hmanga Project thawhte a ni a. Hna 31 thawhna atana sum ruahman hi a vai chuan cheng vbc. 1,220.20 a ni. MSPMC-in an endik tawh zinga Project thenkhat, hna tha lo leh a nih tur ang pha lo te chu siamthat tir mai bakah Department a endikna a mawhphurtute chunga dan anga action la tura thurawn pek te pawh a awm bawk niin tunhnaia MSPMC hmalakna tlangpui thlirletna tihchhuahah tarlan a ni a. Project an tlawh tam zawk hi Contrator-te hian a tira zawh hun tur bituk (scheduled completion time) an pel deuh vek hlawm a. Department lam atanga vil hneh tawk loh avang te, Covid hri leng leh hmanrua chawkluhna lama harsatna avangte a ni hlawm a. Hun pek belh chhung ngeia hna fel fai taka an zawh theih nan Resource Based Work Program rintlak siama zawm nghal turin a vawngtu Department leh Contractor te hriattir thin an ni.

MSPMC in Project an endik tawh tam ber hi Non-Works Department (Project chinchang hrethiam Engineer te awm lohna) te thawh a ni a. Contractor te hnathawh endik kawngah harsatna lian tak awmin, hna quality-in a tuar tlangpui a. Hna thenkhatah chuan a taka hna thawktute hi a hming kengtu Contractor ni lovin midang hminga thawk te niin a lang bawk. Hetianga Contractor ten an hna,midang kuta an dah hi project hna hian a tawrh phah em em niin an sawi bawk.