Mizoram-a raltlan awm mek te buhfai sem tur tunkar chhungin phurhluh zawh hman beisei a ni

Mizoram-a raltlan awm mek mi 40,000 velte tanpuina atana a thlawna buhfai sem tur chu phurhluh zawh tep a ni.

Food, Civil Supplies & Consumer Affairs (FCS&CA) Department hotute hnen atanga thudawn danin sawrkar laipui ruahmanna anga buhfai Metric Tonne 1,379 leh quintal 34 phurhluh hna hi zawhfel a ni tep tawh a. Tunkar chhung hian phurhluh zawh hman beisei a ni. Food Corporation of India (FCI)-in pekchhuah phalna (release order) a tihchhuah mai loh avangin buhfai phurh hna hi an tan tlai a. Chuti chung chuan phalna hmuh veleh atangin phurhluh nghal a ni a. Tunkar hi chuan zawhfel vek tum a ni. Buhfai hi District hmunpui thlenpui niin Kudam-ah dah nghal zel a ni a. FCS&CA Director chuan tunkar chhung hi chuan phurh zawh fel vek hman an inrin thu Akashvani Aizawl a hrilh a. Hemi hnu lamah chuan Home Department ruahmanna-in District 11-a Bawrhsap Pisa-a hnathawkte'n a sem hna an buaipui zui dawn a ni. 

Tarlan tawh thin angin, sawrkar laipui Ministry of Home Affairs chuan Mizoram a awm mek raltlante tanpuina atan an ei tur buhfai cheng vbc. nga (5) hu ruahmanin hei hi a thlawna sem tura tih a ni a. Supply Department hotute chuan cheng vbc. 5 hi buhfai leina, a phurh chhuahna leh a semna senso daih vek tura ngaih a nih thu an sawi a ni.

Hriat theih hnuhnung berah Mizoram-ah hian Myanmar atanga sahimna zawnga raltlan mi 33,004 an awm a, Bangladesh atanga raltlan mi 2,014 an awm bakah Manipur-a tharum thawhna avanga humhimna zawnga rawn tlanlut pawh tam tak an awm a, an zinga mi thenkhat chu an kir leh tawh chungin tunah hian mi 4,200 chuang vel la awm anga ngaih a ni a. Manipur atanga rawn lut hi an tam lai berin mi 12,000 chuang an tling a, Myanmar raltlan pawh hi an tam lai berin mi sing li an chuang a ni.