Mizoram-a Cyber Crime-ah sum kaihhnawih a tam

Mizoram-a Cyber Crime zingah sum kaihhnawih inbumna a tam ber a. Kumin thla kaw chhungin sumkaihhnawiha inbumnaah cheng vbc. 8 chuang a kalral a ni.

Mizoram Journalists’ Association (MJA) leh Mizoram Police chuan tunhnai khan Mizoram khawpui hrang hrangah Cyber Crime zirhona an buatsaih a. He huna thusawitu Mizoram Police Cyber Crime-a thawktute chuan Cyber Crime inbumna zingah sum kaihhnawih inbumna a tam ber tih sawiin, Case an neih 80% deuhthaw chu sum leh pai a inbumna a ni tih an sawi a. Kumin January atanga September inkar chhunga sum kaihhnawih inbumna chu Rs. 8,00,31,849.35 a tling nia sawiin, January-ah Rs. 60,86,864; February-ah Rs. 67,91,615; March-ah Rs. 1,59,97,245; April-ah Rs. 30,86,751; May-ah Rs. 28,05,724; June-ah Rs. 38,84,718; July-ah Rs. 2,57,36,078.77; August-ah Rs. 24,35,072 leh September-ah Rs. 1,32,07,781.58 te a ni tih an sawi a. Sum inbumna kaihhnawih hi hmuhlet leh a har em em a, inbumna zinga 10% vel chauh an hmu let thei niin an sawi bawk.

Cyber Crime-a thawktute chuan sum leh pai inbumna zingah Army Scam chu tam berin mi sualte hian sipai lemah changin tlawm deuh deuhin thil an zuar a, hrechiang loten pawisa pein sum thahnem tak an hloh thin niin an sawi a. Hei bakah hian thil thawn tlan (khul) ngai a awm nia sawiin, mi tam tak sum an laksak thin niin an sawi bawk a. Heng misualte hian an pawisate hi account hrang hrangah an thawn darh ngah zel a, hei bakah ATM hmanga an lakchhuah zung zung thin vangin hmuhlet bakah chhuichhuah an har niin an sawi bawk.

Sum kaihhnawih inbumna zingah mipat hmeichhiatna rawngkai (sextortion) hmanga mi vau chu a hluar hle niin an sawi bawk a. Misual te hian video call hmanga biain an mi biakte chu inphel ruak turin an ti a, chu chu lo record-in a hnuah pawisa an pek loh chuan an Sex Video chu tihdarh ah an vau leh thin niin an sawi bawk a. “Hetianga buai zingah hian mipa kum 40 atanga 60 inkar an tam ber a. Pastor, Kohhran Upa, Kohhran Rawngbawltu leh khawtlanga mi langsar tak tak pawh thahnem tak an buai tawh a; chuvangin, fimkhur a ngai hle a ni,” an ti.

Investment Scam-a sum chân Mizo zingah thahnem tak an awm niin an sawi bawk a. “Mi thenkhat chu a pung tam deuh hmuhlet tumin an sum an dah (invest) a, a tirah chuan sum hi hmulet thei thin mah se a tam deuh hnuah mi sualte hi biakpawh theih lohin an awm thin a. Chuvangin, RBI-in sum pung thei tura bithlaih aia sanga sum punna hi chu awih loh a him ber a ni,” an ti a. Hei bakah hian link hriatchian loh click mai mai te, online a thian na zawng rin lohte hi a him ber niin an sawi a. Cyber Crime-a thawktute chuan internet hmanga inbumna kaihhnawihah hian chawhrualin nitin FIR 20 vel dawng ang an nih thu an sawi bawk.