Kumin ah ruihhlo vbc. 188.64 man zet man a ni tawh

Kumin-a thla 10 kalta, January atanga October thla chhung khan Mizoram Police te’n ruihhlo chi hrang hrang cheng vbc. 188.64 chuang man an man.

Mizoram IGP (Law and Order) Lalbiakthanga Khiangte sawi danin kumin a thla 10 kalta chhung khan ruihhlo kaihhnawihah thubuai 305 ziahluh niin ruihhlo tawlh leh zawrh chungchanga inhnamhnawih mi 412 man an ni bawk. Police hian kumin chhung hian Heroin an man tam hle a, kg 67 leh gram 82 manin hei hi cheng vbc. 20.34 man vel nia chhût a ni a. Heroin kaihhnawihah thubuai 256 ziaklutin mi 341 an man bawka ni. Methamphetamine pawh kg 480 leh gram 884 manin hei hi cheng vbc. 62.51 man nia chhût a ni a, a kaihhnawihah thubuai 23 ziaklutin mi 44 man an ni. Police-te hian Crystal Meth kg 35 leh gram 155 manin, cheng vbc. 105 leh nuai 46 man nia chhût a ni a, a kaihhnawihah hian thubuai 4 ziaklutin mi 3 man an ni bawk.

Hei bakah hian Police-te hian October thla khan tunhmaa hriat hlawh lo tak Caffein Aanhydrous) quintal 1 leh kg. 75-a rit an man bawk a; hei hi cheng Nuai 15.6 man vel nia chhût a ni. Ruihhlo dang an man zingah tunlai thalaite’n an uar thar leh Ganja kg 294 leh gram 925 a tel a; hei hi Rs. 14,74,000 man a ni a. Ruihhlo dang an man te chu Alprozolam leh khuh damdawi (codeine) te a ni a, khuh damdawi hi cheng nuai khat chuang man zet a ni bawk.