MNF Party hruaitu ten Manipur-a Hmar Inpui an tlawh

MNF Party chuan nimin khan Manipur-a Hmar Inpui tlawhin tunhnaia CRPF ten an kahhlum Manipur-a mi te ralna an hlan.

MNF Sr. Vice President Dr. R. Lalthangliana leh a Team te hian nimin khan Rengkai, Churachanpur-a Hmar Inpui tlawhin Hmar Inpui General Headquarters President Rev. Rose Infimate leh Hmar Students Association, Gen. Hqrs.Rengkai Churachanpur-ten an lo dawngsawng a, tunhnaia CRPF hoten an kahhlum hnam pasaltha mi 10 te leh rawng taka thah Zosangkimi Hmar te ralna an hlan a. Dr. R. Lalthangliana chuan anmahni lo dawngsawngtu te chu MNF hminga chibai bukin, tun tuma kan hnam pasaltha mi 10 te leh Zosangkimi Hmar rawng taka thah an ni khan na takin an rilru a vit tih sawiin, an kalsan tak an chhungte zawng zawng Pathian in awmpuia thlamuan tura a duh thu a sawi a. Hnam pasalthate martar-na hian Zofa khawvel hmun tina awmte min phuar khawma min ti pumkhat sauh sauh tura a duh thu sawiin, “Inthen thei kan ni lo tih kan hriat reng a tul a, ram chuan ri neiin hnam chuan ri a nei ve lo a, thinlung chhungrilin khawvel hmun tina Zofa unaute inpumkhatna nghet tak nei sauh sauh turin ka sawm che u a ni,” a ti bawk.