Chhiahtlang-ah Truck in In pakhat a hnawl
Chhiahtlang atanga thudawn danin nimin Nov. 15, 2024 zing dar 4:45 vel khan Chhiahtlang Chhim Veng-a Lalpandika te In luahlai NH-54 kawngkam-a awm chu kawngpui-a tlan Truck (Hyva Tipper) RJ-14/GN-9384 chuan a su a, he In ah hian chhungkaw pa ber Lalpandika leh a nupui te bakah a fate pahnih khawsa in tunhnai mai-a In dang thar an ni a, In chhia hian chim hnan mah se vanneihthlak takin mihring thi leh hliam tuar an awm lo a ni.
.jpeg)
He In sutu Truck hian In a sut hma hian an thenawma Zalianvela kawt-a Tuizem dah chu suin a chhe vek a, Electric LT Line pawh a su tlu bawk a, In a sut hnu hian lirthei khalhtu hi Motor dang-ah pakaiin a tlanbo zui nghal a, zawn zui ni mah se man a nih erawh hriat a la ni lo a, vanduaina thlen chhan kimchang pawh hriat theih a ni lo bawk.
He In chhia hi Chhiahtlang Vengchung a Lalremliana te In niin Lalpandika te hian an luah a, nimin khan khawtlang in In chhia senghawi hna hi hnatlang-a thawkin vanduaina tawk chhungkua te bungrua pawh a theih anga senghawi a ni bawk.