Minister in sawrkar laipui-a mi pawimawhte a kawm
Labour, Employment, Skill Development & Entrepreneurship (LESDE) Department changtu Minister Lalnghinglova Hmar chuan nimin New Delhi-a Kaushal Bhawan-ah Ministry of Skill Development & Entrepreneurship (MSDE) changtu Minister Jayant Chaudhary hmuin Skill development-a Mizoram hmathlir leh mamawhte a sawipui a. Mizo thalaite’n skill-ah talent tha tak an neih thu leh India rampum huap intihsiakna, IndiaSkills Competition-ah pawh Medal engemawzat lain, WorldSkills Competition-ah Mizoram atangin India aiawh pahnih an tel thu a sawi a. Mizo thalaite theihna haichhuak tak tak turin Mizoram-ah Skill Development Centre changkang leh lian tham neih a tul thu Union Minister hnenah ziakin a thlen a. Union Minister chuan tihpuitlin ngei a tum tur thu a lo hrilh a ni.
Lalnghinglova Hmar chuan MSDE hnuaia peng pawimawh tak pakhat, Sports, Physical Education, Fitness and Leisure Skills Council (SPEFL-SC) kaltlangin sports kaihhnawih job role hrang hrangah skill development training a taka kalpui theih dan tur sawiin, he mi hmang hian Mizo thalaite tuina leh thiam zawng pahnih – Sports leh Skill Development kaihkawp theih nia a hriat thu leh hemi chungchang hi ziaka Union Minister hnenah a thlen tawh thu a sawi a; Union Minister chuan hemi chungchanga Mizoram Sawrkar lehkha thehluh a lo hmuh tawh thu leh tha a tih thu a sawi a, MSDE hnuaia Sports Sector Council-ah a kalphung ennawn mek a nih th a lo hrilh bawk a ni.
LESDE Minister hian niminpiah tlai khan Secretary to Government of India, Ministry of DoNER Chanchal Kumar pawh New Delhi-a a Office-ah a kawm a. DoNER chu Northeast State te tana Ministry pawimawh tak a ni a, he Ministry hnuaia Sports Project dil theihloh emaw tih thin chu hriatsual palh a nih thu an sawidun a. DoNER Ministry hnuaia Mizoram project leh sum dinhmun te thlirdunin, State Sawrkar anga hmalak ngai te pawh an sawi dun nghal a ni.
Sports Department changtu Minister ni bawk Lalnghinglova Hmar hian hemi hmalam hian NITI Aayog, Asian Development Bank leh HCL Foundation hotute a kawm bawk a, Olympic Games 2036 leh National Games 2032-a Mizoram hmathlirte sawipuiin, Mizoram-ah Sports kaltlanga khawpui hmasawnna (urban development), Tourism, zirna leh Skill Development lian tham kalpuina remchang a awm thu leh chutiang atan chuan a hmunhma tur pawh Sawrkarin a neih thu a sawi a. Mizoram in National Games 2032 thleng turin hmathlir a neih thu pawh sawiin, a tihlawhtling turin Asian Development Bank-a Mizoram Sports Project awm mek chu chak zawka kalpui a, thawhho a duh thu te pawh a sawi bawk a ni.