Hmunphiah lei tum 3 awm

Mizoram Agricultural Marketing Board chu nimin khan Chief Minister Lalduhoma hovin a Pisa-ah an thukhawm a, Sawhthing sawngbawlna atana Sairang Horticulture Centrebuatsaih dan tur leh Hmunphiah ro lei thei tur firm zawn mek chungchang sawiho a ni. Hmunphiah ro hi Support Price fel fai taka kalpui a nih theih nan sawrkar hriatpui firm te kaltlanga lei a ngai ni a ngaih a ni a, hei vang hian sawrkar chuan October ni 17 khan Hmunphiah ro lei duh tur firm leh an lei ngamna zat te, an lei tam theih zawng turte zawnna (expression of interest) a tichhuak a. Tun thlengin sumdawng (firm) 13 ten an chhang tawh a, an zinga firm pathum (3) te hian sawrkar rate bituk anga an lei ngam thu an tarlang a. Huntiam chhunga sawrkar rate anga chhang ngam dang an awm loh chuan a chhang ngam awmchhun pathumte hi sawrkar hriatpuia leitu atana ruat (empanel) mai tura ruahmanna siam a ni.

Hei bakah hian Sairang-a Horticulture Centre dinhmun chu he hunah hian sawiho a ni bawk a, helai hmun Sawhthing Processing Unit kalpui nana hman diltu Company pathum aiawhte nena inkawmna te neiin, Unit changtlung taka chantir dan tur hi an duang zui a ni.