Rawtna leh ruahmanna sawiho

Finance Department changtu Chief Minister Lalduhoma hovin niminpiah khan 16th Finance Commission hnena thlen tur Mizoram sawrkar rawtna leh ruahmanna hrang hrangte sawiho a ni.

He sawihona CM Conference Hall-a neih ah hian Chief Minister chuan tun tumah hian 16th Finance Commission hun chhunga State Specific Grant lam an sawiho bik dawn tih sawiin, “Tunhmaa he Specific Grant lo kalpui tawh dan ang thova rawn kal tur a nih hmel avangin sum hmuh beisei a tam thei hmel loh a. Department hrang hrang ten Project in rawn thehluh hi kan thun vek thei dawn lo tih kan hriat a ngai. Kan sum dawn theih tur awm tawka kan ngaih behchhanin kan mamawh zual chauh kan thlan a ngai dawn a ni,” a ti.

He thutkhawm hian 16th Finance Commission hun chhunga State Specific Grant hmanga thawh tur enho niin, Project thehluh thenkhat, tun tuma la tarlan loh te chu a ranglama enho leh nise an ti. Hei bakah hian 16th Finance Commission ten Mizoram an rawn tlawh huna lo dawnsawn dan tur pawh an sawi bawk. Finance Commission hi kum nga chhunga sawrkar laipui leh state sawrkar ten tax an insem dan tur bithliahtu atana India danpui Article 280 anga din a ni a. 15th Finance Commission huam chin hi a tawp mai tawh dawn a, April ni 1, 2026 atang khian 16th Finance Commission rawtna anga kal tawh tur a ni.

15th Finance Commission hun, kum nga kalta chhunga Mizoram sum hmuh Revenue Receipts zaa 42 hi Government of India Grant in Aid atanga dawn a ni a, a dang zaa 42 chu Share of Tax atanga hmuh niin, a la bang zawng chu Own Tax Revenue zaa 9 leh Own Non-Tax Revenue atangin zaa 7 te an ni. Govt. of India Grant in Aid huang (component) atanga kan dawn hi CSS leh Finance Commission grant te zaa 47 ve ve an ni a, a bang zaa 6 hi kawng dang atanga hmuh a ni a. 15th Finance Commission-in Share of Tax-a State share atana a bituk chu zaa 41 a ni.