Lawngtlai-a raltlan te hnenah Buhfai sem tan a ni

Sawrkar laipui leh Mizoram sawrkar hmalaknaa Mizoram-a Raltante tana buhfai sem chhuah tura ruahman chu nimin khan Lawngtlai District Bawrhsap Cheemala Siva Gopal Reddy IAS chuan Lawngtlai Kanaan Refugee Camp tan a hlan.

Heng buhfai te hlanna hunah hian Lawngtlai DC chuan Sawrkarlaipui leh Mizoram sawrkarin Raltlante dinhmun leh harsatna hriain theihtawp a chhuah thin tih sawiin, ei leh bar kawnga an harsatna phuhrûkna pakhat atan Lawngtlai District-a raltlan te hnenah buhfai pek a ni dawn, a ti a. Kanaan Refugee Camp, Chandmary-a awm mekte chu thuawih taka awm tur leh sawrkar hriatpuina tello a an awmna hmun sawn mai lo turin a chah a. Naupangte tana zirna ngaipawimawh a, ziak leh chhiar thiam tura zirna kalpui kawngah theihtawp chhuah tura chahin, Fai leh thianghlim kawngah pawh nasa zawka hmala tur leh an chenna In leh a chhehvel tha taka vawng fai turin chah bawk a ni.

Lawngtlai Bawrhsap chuan Lawngtlai chu International Border a awm a nih angin Ruihhlo tawlhruk kawngah fimkhur a tul thu pawh sawiin, a bik takin raltlante chu ruihhlo zuar leh tawlhruk emaw, Dânin a phalloh thil-a inhnamhnawih lo turin a chah a. Raltlan an nih angin tualchhung mite nena inngaih taka chengho tura tan la turin a fuih a.Harsatna an neihah anmahni tanpui tura sawrkar a awm reng thu a tarlang bawk.

Tun dinhmunah Lawngtlai District-ah hian Myanmar, Bangladesh leh Manipur atangin raltlan mi 8020 awm mekin, a tam ber chu Lawngtlai-a awm an ni a. Raltlante tan hian Buhfai quintal 1520.22 sem chhuah a ni dawn a, hemi atan hian Rs. 15,00,000 sênral tur niin, a hma thei ang bera Refugee Camp zawng zawnga hlan tura ruahmanna siam fel a ni tawh bawk.