5 Star Hotel nei turin Outsourse tum a nih thu sawi

Tourism Minister Lalrinpuii chuan Chaltlang Tourist Lodge chu 5 Star Hotel a nih theihna turin midang kuta hlan (Outsource) an tum tih a sawi.

Nimini-a Aizawl Press Club-a chanchinbumite a kawmnaah Tourism Minister chuan khualzinte tana hmasawnna ruhrel tha nei turin nasa taka hma an lak thu a sawi a. Mizoram in 5 Star Hotel a nei lo chu a veiawm tih sawiin, Plenary, Meeting leh Business Summit liantham dawng turin State in hmunhma a nei lo chu a buaithlak thu a sawi a, Hotel lian tak tak ten Mizoram-a 5 Star Hotel din an duh thu leh anni atanga offer an hmuh thu a sawi a. Chaltlang Tourist Lodge chu 5 Star Hotel a nih theihnan Outsource mai turin hma an la ta tih a sawi a ni.

Tourism Minister chuan hemi atan hian tihtur ang angte an tifel nual tawh tih pawh sawiin, an hmanraw neihsa a hlutna hriatchian a ngaih avangin Assets Valuation hna thawk turin PWD ngen an nih thu a sawi a, anni in a hlutna chhut hna an zawh hunah a hna thawh a dil theih a ni tih mipui hnena puanzarna, Expression of Interest an chhuah mai theih a beisei thu a sawi a, an sawrkar chhung ngeia 5 Star Hotel neih theih a in beisei thu a sawi a ni.