Kut huaihawt thin te Outsourse turin ruahmanna siam

Tourism Minister Lalrinpuii chuan Tourism Department-in Kut (Festival) a huaihawt thin te chu Tender hmanga outsource thin turin ruahmanna thar siam a nih thu a sawi.

Tunkar Inrinni zan thleng awh tur ‘Leitlangpui Music Festival’ hawnna nimin-a Kawmzawl, Pukpui, Lunglei a neih ah Tourism Minister chuan tunhma lama Mizoram a Tourism Department bul tuma Kut (Festival) hrang hrang huaihawt thinah mipui te'n ta neihna rilru kan pu pha lo thin nia a hriat thu sawiin, hemi hi tidanglam turin Tourism Department-in Festival a huaihawt thin chu ennawn a nih thu a sawi a. Mipuite'n an ta neih theih tur festival nei thei tur leh a huaihawt vel pawh sawrkar Department-in buaipui tawh lova, Tender hmanga Outsource thin turin ruahmanna thar siam a nih thu sawiin, mipuite ta neih theih ngei tur Festival dap a nih laiin ‘Serkawn Concert’ hming lo ri chhuakin, Zosap Missionary HW Carter-a, Mizote'n Zochhawni Pa tia kan kohvin kum 1930 chho vela mi dangte tiphur thar a, thu leh hla lama harhtharna a lo thlen chhoh dan leh kum 1932 Favang Awllen laia hlawhtling taka Serkawn Concert an lo huaihawt chhoh dan te hre thar lehin, Leitlangpui mipuite ta neih leh lung tilengtu ‘Serkawn Concert’ chu kum 90 liam hnuah chawi vul thar leh turin hmalak a nih tak thu a sawi a. ‘Serkawn Concert’ tih hming chuan a huam zim deuh avangin Mizoram pum huap, Mizoram zai mi leh hla phuahtute tana platform tha siamna tur, kan hnam nunphung leh tihdan thate chawi vul chhunzawm zelna a nih theih beiseiin, ‘Leitlangpui Music Festival’ tiin a hming chu phuah a nih thu a sawi a ni.

Tourism Minister chuan Leitlangpui Music Festival chu Tender hmanga outsource a nih angin Brighter Co. & BBY Animals Event Management Team te'n he Event buatsaih hna hi an chang tih a sawi a, a hlawhtlin nana theihtawp chhuahtute chungah lawmthu a sawi bawk.

Leitlangpui Music Festival hawnnah hian Organising Secretary, Lunglei Municipal Council (LMC)-a Chief Executive Officer Donny Lalruatsanga chuan inlawmna thu sawiin, Mizoram sawrkar hma lakna avang Leitlangpui-a Rimawi Kutpui hman theih a ni tur chu lawmawm a tih thu a sawi a. Mizote chu lungngaih hunah te, hlimna hunah te pawh thil danga inhnem lovin, rimawi leh zai te'n kan inawi thin tih sawiin, Leitlangpui Music Festival chu zai leh rimawi chawi nun leh thalai talent nei tha tak takte leh zai mite chawikan nan buatsaih a nih thu a sawi bawk.

Leitlangpui Music Festival-ah hian festival chhimtute tan ei leh in leh Souvenir zawrhna stall hrang hrang buatsaih a ni a. Vawiin, November ni 15 chhun dar 12:00-ah Band Contest awmin, tlai dar 3:00 atangin Concert buatsaih a ni leh ang a. A tawp ni, November ni 16-ah tlai dar 2:00 atangin Concert buatsaih a ni bawk ang.