NQAS Certification hmuh lawmna hun hmang

Champhai District Hospital in India rama sawrkar damdawi In tha tehna, ‘National Quality Assurance Standards (NQAS)’ tehfung hmanga endik an nih hnua ‘National Quality Assurance Standards Certification’ an hmuh lawmna chu nimin khan neih a ni.

National Quality Assurance Standards (NQAS) hi National Health Mission hnuaia mi a ni a, India rama sawrkar damdawi In (District Hospital, CHC, UPHC, PHC) te thatna leh damlote himna tehna a ni. NQAS hnuaiah hian tehfung (checkpoints) 462 awmin, March ni 21 leh ni 22 khan Ministry of Health & Family Welfare, Govt. of India rawn tirh State pawn atanga lo kal, NQAS External Assessor te chuan Champhai damdawi In hi an endik a ni.

District Hospital endik tura National Assessor kolut tur hian State Level-ah endikna paltlang phawt a ngai a, State Level endikna paltlang hnu thla ruk (6) chhunga koh tur niin, National Assessor te lo kal hun tur hi hriat lawk theih a ni lo a. Champhai District Hospital hian endikna tehfungah hian za zela 87% an hmu a. Mizoram damdawi In-ah NQAS Certification hmu thei hi Champhai District Hospital bakah Aizawl Civil Hospital, Lunglei Civil Hospital, UPHC 2 leh PHC 3 te an awm tawh a ni.

Champhai District Hospital in National Quality Assurance Standards Certification a hmuh lawmna hun hi OPD Complex-ah neih niin District Medical Superintendent Dr. Zatluanga chuan a kaihruai a, Champhai North bialtu leh Adviser to Chief Minister Er. Ginzalala leh Champhai South bialtu MLA Lt. Col. Clement Lalhmingthanga te chuan he hun hi hmanpuiin Dr. Biakthansangi, Sr. Specialist leh Lalhmangaihzuali, District Hosptal Quality Manager ten District Hospital leh NQAS chungchanga hriattur pawimawh te an sawi bawk a ni.