DoNER Ministry kaltlanga Mizorama hnathawh hrang hrangte thlirletna hun neih a ni

Ministry of Development of North Eastern Region (DoNER) kaltlanga Mizorama hnathawh hrang hrangte thlirletna hun chu nimin khan neih a ni a, he hunah hian Chief Minister Lalduhoma pawh telin DoNER Minister Jyotiraditya M. Scindia pawhin he hun hi a telpui a ni.

Planning & Programme Implementation Conference Hall-a he Review Meeting-ah hian Chief Minister chuan tuna DoNER Minister chu a pa, Madhavrao Scindia te nen thian tha tak an nih thu sawiin, “Chuvangin Pu Jyotiraditya M Scindia pawh hi fate ang maiin ka en a ni,” a ti a. DoNER Ministry chu an pawimawh em avangin Delhi an zin apiangin ani nen hian an inhmuh thu leh min tanpui turin a inpeih at reng thu leh Mizoram min duhsak em em tih a sawi a. “A hova Review Meeting hun tha tak kan nei thei hi ka lawm a, Mizoram tan rah tha tak a chhuah ka beisei,” tiin DoNER kaltlanga Project kalpui meka harsatna awm leh rawtna a neih te, Mizoram in Project thar a mamawhna lai te a tarlang bawk.

He hunah hian DoNER Minister Jyotiraditya M Scindia pawhin Chief Minister Lalduhoma leh a pa te lo inthian thatna avangin Mizoram chu a ngaina tih sawiin, “He inlaichinna thinlung hi thawhhona tha zawk awmtirtu ah hman ka duh,” a ti a. Project endik ringawt turin a lo kal lo tih sawiin, “Kan focus area-a kan zirchianna leh hmasawn zel tura in mamawh rawtna tha tak tak ka rawn keng a ni. Mizoram hi khawchhak lama India chhuahka, hmun pawimawh taka awm a ni a, tihmasawn zel turin kan inpeih a ni,” a ti a. He review Meeting-ah hian hmasawnna nghet leh khuarei daih Mizoramin a hmuh a, hmalam a pan zel theihna tur sawihona leh ruahmanna te neih an duh thu pawh sawiin, “Project kal meka harsatna in neihte chu a theih ang angin kan lo bawhzui zel ang,” a ti bawk.

He thutkhawm ah hian DoNER-a Sr. Economic Adviser Dr. Md Nazmuddin chuan DoNER Ministry in hmasawnna huang thenkhata Mizoram dinhmun tlangpui leh hmalak zelna tur rawtna a neihte a tarlang a. Chung an rawtna te behchhan chuan sawihona an nei zel bawk a. Mizoram sawrkar-a Commissioner Planning changtu Vanlaldina Fanai pawhin DoNER kaltlanga Mizorama hmalaknate a sawifiah bawk a ni.

Nimin-a thutkhawm ah hian Chief Secretary H. Lalengmawia chuan inlawmna thu sawiin, DoNER Project kalpuitu Department changtu Minister te, Chanchal Kumar, Secretary, DoNER leh DoNER Official pawimawhte bakah Mizoram sawrkar Official pawimawh te an tel a ni.