Khauh zawka hma la turin Mizoram sawrkar an ngen

Mizoram Kuhva Chingtu Pawl chuan Myan-mar atanga kuhvarah ro lo lutah khauh zawka hma la turin Mizoram sawrkar an ngen.

Mizoram Arecanut Growers Association ni thin, tunhnaia Mizoram Kuhva Chingtu Pawl (MKCP) tia an pâwl hming thlak ta te hian thuchhuah an siamah kuhva hralh kawngah harsatna an tawh thu an sawi a. Chhungkaw tam tak innghahna kuhvarah chu a lachhawngtu ten an khar a hun mek laiin Myanmar atangin kuhvarah ro leh hring a luh avangin Assam lama duty-ah harsatna a thleng thin niin an sawi a. Myanmar kuhva hring leh Mizoram kuhva hring te hi duty te’n an hriat pawlh vek avangin kuhva kharchhawng ten an lei tha ngam lo a, a manganthlak hle niin an sawi a ni.

Mizoram kuhva chingtute leh Mizo mipuite chu dan lova Myanmar atanga kuhva lo lut do kawngah tangrual turin MKCP chuan an ngen a. Mizo thenkhat, ram dan kalha kuhvarah tawlhru thin te chu inhnamhnawih tawh lo tur leh an Mizo puite hah taka an thawhrah eizawnna tichhetu ni lo turin an ngen a. Sawrkar thar, Myanmar atanga dan kalha kuhvarah tawlhru thin te laka hma la tur Mizoram in a nei chu lawmawm an tih thu sawiin, Sawrkar chu khauh leh nasa zawka Myanmar atanga kuhvarah lo lut reng do kawnga hma la turin an ngen tih an sawi bawk a ni.