Excise & Narcotics Department ten kumin ah Rakzu litre 56,207 zet an man tawh

Excise & Narcotics Department chuan kumin (2024) chhungin Rakzu litre 56,207.095 zet man tawhin zu leh ruihhlo kaihhnawih ah hian Dan bawhchhia mi 6200 an man tawh bakah Heroin pawh kg. 39 zet an man leh tawh bawk a ni.

Excise & Narcotics Department hian Zirtawpni khan Aizawl-a Commissionerate of Excise & Narcotics Conference Hall-ah kumin chhunga an thubuai ziahluh dan thlirletna hun hmangin he hun hi Commissioner of Excise & Narcotics Z. Lalhmangaiha chuan a kaihruai a, he huna tarlan a nih danin Excise & Narcotics Department hian kumin January atanga October thla tawp thleng khan tualchhung-a siamchhuah Rakzu litre 56,207.095 zet an man tawh a, kum 2020 khan litre 46,083.762 manin hei hi kumin hian an khum der tawh a ni. END hotute chuan Aizawl leh a chhehvel-a Zu siamna hmun te chu a thang nia an hriat thu sawiin, thawktu pawh an pung nia an hriat thu an sawi a, henglai hmuna siam te hi Mizoram hmun hrang hrangah thawnchhuah a nih thu an sawi bawk a ni.

Rakzu bakah hian kumin chhung hian Zu bilhlai Tin 1,00,821 zet manin Dawidim pawh kg. 116.577 zet an man tawh bawk a, Sapzu (IMFL) um puitling 13,687 manin a chanve um 4,240 leh Quarter bottle pawh um 8,020 an man tawh a, heng bakah hian Beer um 162 leh can 25,750 an man tawh bawk a, Burma lam atanga lakluh BEDC pawh litre 3,271.340 zet an man tawh bawk a ni.

Kumin chhung hian Ruihhlo lam pawh Excise & Narcotics Department hian an man hnem tawh hle a, October thla tawp thleng khan Heroin kg. 39.018 man tawhin Ganja pawh kg. 561.725 zet an man tawh bawk a, Khuh damdawi (Cough Syrup) pawh 6,080 manin Alprazolam Nitrazepam, Diazepam leh Tramadol pawh mum tam tham tak an man tawh a, Methamphetamine pawh kg. 122.435 zet an man tawh bawk a ni.

He thutkhawm ah hian kan hma lawka Krismas leh Kumthar lo thleng turah Mizoram mipuiten him tak leh thlamuang taka hunpui an hman theihna tura Mizoram hmun hrang hranga zu leh ruihhlo khuahkhirhnaa hmalak dan tur rualkhai tak, Standard Operating Procedure duangin khauh zawka hmalak an rel bawk a ni.