Raltlan te tanpuina tur buhfai tihfel theih ala ni lo

Mizoram-a raltlan 40,000 chuang awmte tana Central sawrkarin cheng vbc. 5 hu buhfai a pek tur chu tihfel a la ni lo.

Home Department hotute sawi danin Food Corporation of India (FCI) hnen atanga buhfai lak chhuah phalna ‘release order’ an la hmuh loh avangin Food, Civil Supplies & Consumer Affairs Department hotute chuan buhfai hi an la chhuak thei rih lo niin an sawi a. Buhfai sem tur Metric Tonne 1,379 leh Quintal 34 lakchhuah phalna FCI-in an la pek loh chhan hi buhfai man tur pawisa an la dawn loh vang niin an sawi thung. Home Department hotute chuan hemi chungchang hi Ministry of Home Affairs a thlen leh a ngaih thu an sawi a. MHA hnenah hian buhfai man tur hi pechhuak thuai tura ngen rualin a lakchhuah leh semchhuah hun an bituk pawh pawtsei tura ngen a ngai dawn niin an sawi a. Ruahman dan chuan buhfai hi FCI atangin Supply Department-in an lachhuak anga, Home Department nen tangrualin District hrang hrang thuneitute hnena an mamawh dana sem a, chu chu raltlante hnena sem leh tur a ni.

Ministry of Consumer Affairs, Food & Public Distribution chuan September ni 19 khan buhfai MT 1,379.34 chu Supply Department-ah lakchhuah phalna rawn pe-in ni 60 chhunga chingfel vek tura ruahman a nih thu a rawn hriattir a. Heti chung hian ni 45 a liam hnuah pawh engmah a la kalpui thei lo ni a hriat a ni. Tun dinhmunah hian Myanmar raltlan hi mi sing thum chuang Mizoram-ah awmin Bangladesh atanga raltlan rawn lut 2,014 leh Manipur lam mi 4,200 chuang hret awm ang a chhut a ni.