Sawrkar dan dinglai thiahna sut leh a ni

Mizoram sawrkar Finance Department-in hmasawnna hna thawk lo Department-te'n hna an neih apianga PWD hnena pe tura thupek dinglai a thiahna tunhnaia a tihchhuah chu Zirtawpni khan sut leh a ni.

 Finance Department Secretary Lalthansanga chuan October ni 22 khan hriattirna chhuahin hmasawnna hna thawk ve lo (Non-Works Department)-te hna thawh theih ve phal chin awm thin thiah a nih tak thu hi chhuahin, hmasawnna hna thawk lo Department-te'n hnathawh tur an neih ang chi eng pawh PWD kuta pe kher lovin an Department-in an buaipui thei tawh ang tih tarlan a ni. Mizoram Public Procurement Rules, 2020 rule 92 tlawhchhanin an duh phawt chuan hna hi an Department-in an thawk thei ang tih a ni a. Hetiang ti tur hian Finance Department remtihna lak a ni ang tih a ni. He hriattirna hi Engineer te chuan duh lovin Zirtawpni kaltaa Mizoram Engineering Service Association (MESA) inkhawmpui-ah pawh an duh loh thu hi an puang a ni. 

Hemi ni vek hian Finance Department Secretary Lalthansanga chuan hriattirna dang tichhuakin October ni 22 a hriattirna a lo chhuah tawh chu hnuhdawh leh a nih thu a tarlang ve leh thung a, a hmaa kalpui thin dan angin kalpui zui a ni leh dawn ta zawk a ni.