Buk tling ngeia Ration buhfai pe turin Retailer te ngen

Serchhip District Consumer Association (SDCA) chuan Serchhip District-a Retailer te chu buk dik taka Ration buhfai pechhuak turin an ngen.

Nimin-a thuchhuah an siamah Serchhip District Consumer Association (SDCA) chuan Serchhip Kudam-a Weightbridge hman theihloha awm reng chu Chief Minister leh Department hotute hnenah siamtha tura an ngenna ngai pawimawh in October 26, 2024 (Inrinni) khan sawrkar chuan phai lam atanga mithiam rawn tirin a khawl part thlak ngai te rawn thlakin siamthat a nih thu leh lawmawm an tih thu an sawi a. “Kan Chief Minister leh Bialtu MLA ni bawk Pu Lalduhoma leh kan sawrkar leh Department hotute chungah lawmthu kan sawi a ni,” an ti.

SDCA chuan hetianga Serchhip Kudam a Weightbridge a lo that takah chuan Buhfai buk pawh a dik tawh tura ngaih a ni tih sawiin, “Chuvang chuan Serchhip District huamchhunga Retailer zawng zawngte mipuia an buhfai pekchhuah te a buk dik taka pechhuak turin kan inngen a, insiamrem leh in cut then awm lova dik taka mipui chanai pechhuak tawh turin retailer zawng zawng te kan ngen a ni,” an ti a. Hei bakah hian Kudam atanga an Buhfai lakchhuak te a diklo anih chuan complaint ngam turin an chah bawk a, “Kudam atanga an buhfai lakchhuah a diklo tih chhuanlama mipui lama a buk tlinglo a sem thin hi tunah chuan a buk tling ngeia sem tawh turin kan ngen a ni. Dan bawhchhia an awm anih chuan a concern department te nen a tul anga hmalak zui a ni ang,” an ti bawk.