Aizawl chhehvel-a lui tui pathum te a thianghlim lo

Aizawl leh chhevel a lui pathumte chu Central Pollution Control Board-in lui tui thianghlim leh thianghlim loh tehfung a siam hmanga endikna ah India ram chhunga lui thianghlim lo 300 zingah telh a ni.

He thu hi Akashvani palai hnenah Mizoram Pollution Control Board-a Scientist ‘C’ Dr. Lalramnghaki Pachuau chuan sawiin, Mizorama lui tuite thianghlim leh thianghlim loh chu a sample laa an endik thin thu leh ngun taka tehfung hrang hrang hmanga Laboratory-a an endik thin thu a sawi a. Chung an endikna atang chuan Central Pollution Control Board chuan India rama lui tui bawlhhlawh zual BOD Level 3, Miligram per litre chunglam list 300 chuang a tihchhuah zingah Mizoram a lui pathum Chite, Lawibual leh Tuikual luite chu an tel thu sawiin, National Green Tribunal pawhin heng lui tui bawlhhlawh zualte hi a thenfai hna rang taka thawk turin State Sawrkarte thu a pe niin a sawi bawk.

Dr. Lalramnghaki Pachuau chuan Mizo-ram a lui tuite a bawlhhlawh zual zel lohna atan tan lak a ngaihzia pawh sawiin, tui hna thianghlim a awm zel theihna tur atan tan lak a pawimawh thu a sawi a. Mihringte chenna khawvel ngaihtuah chunga lui dunga bawlhhlawh leh leivung paih mai lova sawrkar dan zam ngaih pawimawh kawnga mitinin hmasawnna an neih a pawimawh takzet thu a sawi bawk.