AIS Cadre hran neih chungchang CM in sawipui

Mizoram in All India Services Cadre hran a neih ve theih dan tur chungchangah nimin khan Chief Minister Lalduhoma chuan Mizoram IAS Association hruaitute leh All India Services member dangte bakah Zoram Research Foundation hotute a kawm.

He inkawmna ah hian Mizoram in All India Services (AIS) Cadre hran a neih ve theih dan tur chungchanga hma lo lak tawh dan te sawilan niin Cadre hran neih that bikzia leh lukhawng a neih bik ziate pawh sawi a ni a, sawrkar tharah beiseina sang tak nen tha thara hmalakna awmze nei lehzual kalpui an duh thu an sawi a. Chief Minister chuan, he thil hi a kaihhruai sawrkar pawhin a duh leh a rualawhna a nih thu te, nasa lehzual a bawhzui a duh thu te a lo hrilh a. Cabinet Meeting-ah sawiho tura chhawpchhuah a lo tum tur thu a hrilh bawk a ni.

He hunah hian Mizoram IAS Association atangin Vanhela Pachuau, C. Ropianga, Lungmuana leh Lalzirmawia Chhangte te an tel a. Indian Police Service (IPS) atangin Lalrokhuma Pachuau, C. Dothanga, P C. Lallawmsanga, Zorammawia leh C. Laldina te telin Zoram Research Foundation atangin Prof. Thangchungnunga leh Rochamliana te an tel bawk a ni.