AR sawn chungchanga MNF hmalakna tarlang

MNF Sr. Vice President hlui Tawnluia chuan ‘Assam Rifles in an ram luah te a vaiin an chhuahsan tur a ni’ tih chu an dinna nghet tak a nih thu a sawi.

Mizo Hnam Run-a Chhung Inkhawm nimin-a neih ah Deputy Chief Minister hlui leh MNF NCC Tawnluia chuan Aizawl khawpui laili atanga Assam Rifle sawnchhuahna chungchanga MNF party in hma a lo lak tawhna te sawiin, “Kum 1952 khan S.Bartakati Aizawl DC, Luhshai Hills in Assam Rifle Standing Order No.II of 1952 a siam a, chu chu Assam Gazzette ah ni 8.8.1952-ah chhuah a ni. Chutah chuan Khatla AR te awmna hi an thingtuah lakna atan chauha pek an ni a, Land Ownership pek tel an nilo a, an tidanglam thianglo a, an hmanloh chuan sawrkar ah an pelet leh tur a ni,” a ti a. “Kum 1986-a remna thuthlung ziah a nih khan Pu Denga ngaih pawimawh hmasak ber zing ami chu AR sawnchhuah a ni. Zokhawsang-a AR ram tura kan pek pawh Pu Denga CM lai, Revenue Minister ka nihlai a ni a, a tirah kan leng lo e, tiin an rawn report-a, Survey neih nawn leh niin, mimal ram te dilin cheng vbc. 92 lai compensate ah sen phah a ni a, tichuan a ram zau zawng chu 1296 acre niin May 31, 1988-ah Zokhawsang-a an awmna tur hi tihfel sak an ni a, AR sawnchhuahna tura hmalatu chu Pu Laldenga a ni,” a ti bawk.

Zokhawsang-a AR hmun chungchang sawiin, “Kum 1988 a President Rule-ah kan luh leh tak avangin sawlai ram saw a thing ta thuap mai a. Kum 1998 kan sawrkar leh khan kan CM hnenah, 'Camp sakna tur min dil chhuahpui rawh' tiin an ngen leh a, tichuan tuna an Camp sakna tur saw kan President hian vbc. 145 chuang a nawr chhuahsak a ni,” a ti a. “Kum 2006 khan Land Lease in Mizoram sawrkar in AR hnenah kum 99 chhung an awmna turin mumal taka tihfel a ni a, Tui, Eng leh Kawngpui, an insawnna tura an mamawh ang chu kan pe vek a ni,” a ti a. Kum 2002-ah AR chhuahsan tur ram awl chu vantlang (public purpose) ah hman ni rawh se tih dan siamin, Legislation-ah an passed thu leh AR lam pawhin an insawn dawn chuan tia tihfel ni rawh se an tih zawng zawng pawh tihfel vek a nih thu a sawi a. “MNF chuan Pu Denga hun atang tawhin ‘AR hian an ram luahte hi avaiin an chhuahsan tur a ni,’ tih hi kan dinna nghet tak a ni,” a ti bawk.

Assam Rifles Biak In hmun chungchang ah tuna Chief Minister in MOU draft lo awm tawhah AR neih hlen tur anga a sawi chu thu dik lo a nih thu pawh Tawnluia chuan sawiin, “Biak In hi Zokhawsang-a an insawn hunah Church Building leh a compound te hi Mizoram Synod hnenah hlan a ni ang, tih a nih angin kum 1987-ah kan pe a ni,” a ti a. “AR Biak In hi kan chhuhsak lo a, kan lo humhalh sak zawk a ni tih hi Zoram mipui hriatah ka sawi duh a ni,” a ti bawk.