Tuirial-a SWMC chungchang Larsap in a sawipui

Mizoram Governor Indra Sena Reddy Nallu chuan nimin khan Raj Bhavan-ah Solid Waste Management Centre, Tuirial enkawltu Sawrkar Department hrang hrang hotute a kawm.

He hunah hian Governor Indra Sena Reddy Nallu chuan hmasawnna kawng zawh tur chuan mahni dinhmun hriat chian hmasak a pawimawh thu sawiin, Aizawl hi khawpui fai tak a siam tur chuan bawlhhlawh kan sawngbawlna hmun dinhmun hriatchian a pawi-mawh thu a sawi a. Chumi tur chuan thawktuten an tlawh tam a tul thu leh kan dinhmun ang ang kan pawm hmasak a pawimawh thu a sawi a. Solid Waste Management Centre, Tuirial chu Aizawl leh a chhehvel khaw hrang hrang tana faina kawng a hmasawnna thlentu a nih ngei theih nan a chhung a awmsa, bawlhhlawh sawngbawlna khawl hrang hrangte hnathawk thei a siam a pawimawh thu a sawi bawk.

Thutkhawm ah hian Solid Waste Management Centre, Tuirial-a Bio-Medical Waste Management Centre kalpui dan tur te, Vermi-compost Unit awmze nei zawk a kalpui dan tur te leh khawtlang hruaitute kaltlanga chhungkaw tinah bawlhhlawh thliarhran inzirtirna kalpui dan tur te sawiho a ni.

AMC tarlan danin Aizawl khawpui chhunga hnawm sakhat te Pathianni tih loh kar tluan-in SWMC, Tuirial-ah hian phurhluh a sawngbawl thin a ni a, hemi tur hian AMC chuan thawktu 35 a ruai a ni. Nitin hnawm paih truck 190 velte'n bawlhhlawh Ton 119.42 vel zet SWMC Tuirial-ah hian an chhungkhawm thin a; heng zinga Ton 89.09 hi bawlhhlawh tawih thei (wet waste) niin, a dang Ton 30.33 hi bawlhhlawh tawih thei lo (dry waste) a ni. Hengte hi sawngbawl niin nitin dry waste Ton 7.98 vel hi hmannawn (recycle) leh theih turin AMC pawmpui Scrap Dealer 11 te hnenah hralh thin a ni a, wet waste-te hi Mechanical Compost Plant hmangin kumin March thla atang khan leitha ah chantir zel an ni.