SHC Inthlanpui neih tur atan Party ten Candidate puang

Thla thar November 5-a Sinlung Hills Council inthlanpui vawi hnihna neih tur atan Political Party te chuan an Candidate turte an puang tan ta.

Sinlung Hills Council Inthlanpui vawi 2-a hi thla thar November 5-ah neih tur niin he inthlanna chuh tumte tan hian tun thla ni 10 thlengin Nomination Paper thehluh theih a ni dawn a, he inthlanna neih turah hian Rorellai Zoram People’s Movement (ZPM) leh HPC Party te chuan thawhhona thu-thlung siamin nimin khan an Candidate turte hi an puang a, nimin-a ZPM in Aizawl-a an Party Office-a Chhung Inkhawm an neih ah ZPM Vice President leh Election Committee Chairman W. Chhuanawma chuan ZPM Candidate tur mi 8 te a puang a, Bial dang 4 te chu an thawhpui HPC Party in an chuh thung dawn a ni.

Mizo National Front (MNF) pawhin Sinlung Hills Council Inthlanpui-a an Candidate tur hi nimin khan puangin Aizawl Mizo Hnam Run-ah an President Zoramthanga chuan a puang a, MNF hian Seat 12 awmna ah Bial 10 an chuh dawn a, an thawhpui Hmar People’s Convention (Reformation) chuan bial 2 an chuh thung dawn a, Sakawrdai North leh South bak chu MNF Candidate vek an ding dawn a ni.

Congress Party chuan Sinlung Hills Council Inthlanpui neih tur atana an Party Candidate turte hi Vawiin hian an puang ve dawn thung a ni.

Sinlung Hills Council term hi kumin November ni 21 ah a tawp dawn a, Aizawl District-ah Constituency 6 awmin Polling Station 19 zingah Critical Polling Station 6 a awm a. Kolasib District-ah Constituency 2 awmin Polling Station 7 a awm a, a vai hian Critical Polling Station-a puan a ni. Saitual District-ah Constituency 4 awmin Polling Station 12 a awm a, heng zingah hian Polling Station 3 te chu Critial Polling Station atana puan an ni bawk.