Kumin ah ruihhlo man tam

Kumin (2024) thla 9 kalta, January leh September thla inkar chhung khan Mizoram Police leh Excise and Narcotics Department hnathawkte chuan ruihhlo chi hrang hrang tam tham tak an man hman.
Thla kaw kalta chhung hian Police leh Excise & Narcotics Department te'n Heroin an man belhkhawm chu kg. 104 leh gram 266 zet a ni a. Methamphetamine hi kg. 577 leh gram 59 manin Ganja kg. 841 leh gram 98 an man bawk a. Crystal Meth hi Police-in kg. 35 leh gram 155 an man a, Excise and Narcotics hian nikum khan engemaw zat manin kuminah erawh chuan man an la nei lo thung a ni.

Police te hian kumin January leh September inkar chhung khan Heroin kg. 67.19 an man a, Excise & Narcotics Department in kg. 37.76 an man thung a. Methamphetamine hi Police in kg. 454.624 manin Excise & Narcotics Department in kg. 122.435 an man bawk a. Ganja hi Police lamin kg. 294.765 an man laiin Excise & Narcotics chuan kg 546.335 an man thung a. Ruihhlo an man zawng zawng hi cheng vbc.184.44 hu niin an chhut a. Heroin bik hi cheng vbc. 20.15 hu a chhutin, Crystal Meth an man hi cheng vbc. 105.46 hu niin an chhut a, Methamphetamine an man hi cheng vbc. 59.10 chuang hu niin an chhut a, Ganja an man hi cheng nuai 14.73 chuang hu a chhut a ni bawk. Excise & Narcotics Department thuneitute erawh chuan an ruihhlo man hlut zawng hi an tarlang ve lo a ni.

Police hian dan kalha Heroin tawlh chung-chang ah thubuai 246 ziaklutin mi 328 an man a, Crystal Meth kaihhnawihah thubuai 4 ziaklutin mi 3 an man a, Methamphetamine tawlh a rinhlelh mi 40 manin thubuai 19 an ziaklut a. Ganja chungchang ah thubuai 17 ziaklutin mi 20 an man bawk a ni.

Tunhnaiah Mizoram-ah heng ruihhlo chi hrang hrang hi a tam hle a, February ni 1, 2021 a Myanmar sipaite'n mipui thlan sawrkar paihthla a thuneihna an pawnglak atang khan Mizoram a ruihhlo tawlh hi a hluar zual nia hriat a ni.