Tuialhthei harsatna sawifiah

Petroleum Entrepreneurs' and Transporters' Union of Mizoram (PETUM) chuan Mizoram a tuialhthei harsat chhan an sawifiah.

Mizoram Commercial Vehicle Union (MCVU) ten tunhnaia thuchhuah siama Oil Tanker a rawn lut tha nia an sawi chungchangah PETUM chuan, “Oil tanker-te hi kawng a la that tawk loh avangin an thlen hun tur angah an thleng hman lo a, a let dawnin an tlan tlem. Hemi avang hian tuialhthei lakluh kawngah duh thu a la sam lo hle a, Petrol Pump-te pawhin duh angin hralh tur kan dawng thei lo a ni,” an ti a. Mizoram-ah tuialhthei mamawhna a sang viau tawh tih tarlangin, “Thla khatah 8500 KL te kan mamawh thin lai te a awm a, tun dinhmun angah chuan 7500 KL chauh te lakluh a nih avangin tuialhthei hi hnianghnar takin Kolasib District-a Petrol Pump-te tih loh ah chuan Petrol Pump dang ten duhkhawp hralh tur kan nei thei meuh lo,” an ti a. Petrol Pump-te chu hralhchhuah tur bituk sa nei an nih avangin an sumdawnna a kal that theih nan a tan lak ngai viaute pawh an awm thin zawk tih an tarlang a ni.

PETUM chuan mipuite harsatna siam an tum a ni ngai lo tih tarlangin, “Hnianghnar taka mipuite mamawh phuhruk dan harsa chung chung pawhin kan ngaihtuah thin zawk a ni. Petrol pump-te hian a black in kan hralh lo a, min rawn dawrtu customer-te hnenah kan hralh zawk mai chauh a ni,” an ti a. “Kan sumdawnna pawl dangin an duh dan ang anga kawih her an tum hi a mak kan tiin kan hrethiam lo hle a ni,” an ti a. Petrol pump tam zawkte chu Oil Tanker neia lirthei hmanga eizawng ve tho an ni tih tarlangin, “Thu inchhuah khum tawp loa thu chiang zawk in hriat saka inbiak tlan zawk thin nise a lawmawm khawp ang. Petrol pump-te hi sawrkarin kan hralhchhuah theih chin tur min bithliah sak (security stock) bak chu mipuite mamawh ang zelin kan hralh thin a, stock a tam phei chuan an mamawh ang zat kan pe mai zel,” an ti bawk.