Tourism Minister in Sialsuk khua a lawmpui

India rampum huapa ‘Best Tourism Village - Community based Category’ a lawmman dawngtu Sialsuk khawtlang hruaitute chu nimin khan Tourism Minister Lalrinpuii chuan an lawmman lak lawmpuina thingpui a inpui.

Tourism Minister Pisa-a he hun hman ah hian Minister Lalrinpuii chuan Sialsuk khawtlang hruaitute lawmpuina leh fuihna thuchah sawiin, ram pum huapa lawmman dawng thei khua an ni chu a chhuang takzet tih a sawi a. Sialsuk chu khaw nuam tak leh khualzin hip thei tur hmun mawi leh nuam tak tak tamna a ni tih tarlangin, Sawrkar pawhin theihtawp chhuah a chung hmunte chu a vilpui ve tur thu a sawi a. Lawmman dawng thei tura khawtlang mipuite inpekna pawh fakawm a tih thu sawiin, khualzin hip tur chuan thil dang zawng aiin a hmuna cheng mipuite chu an pawimawh thu a sawi a. Khawtlang hruaitute chu an khaw hmun hlute vawng him a an hmalakna entawn tlak tak takte chu chhunzawm zel turin a chah nghal bawk a ni.

He hunah hian Sialsuk VCP R.Lalruatkima chuan Best Tourism Village an nih theih dan report a pe a. Tourism Department hotute atangin Secretary Dr. Lalrozama IAS chuan Mizoram tana Tourism pawimawhna te leh thalai tam tak eizawnna pe theitu a nih dan te a tarlang a. Sialsuk khua in Community based category-a Best Tourism lawmman an dawng chu Mizoram nen a inhmeh a, khawtlang leh Department thawhhona that zia a tarlang hle a a hriat thu a sawi bawk a ni.

Sialsuk khua hian Community-based category-a Best Tourism Village Awards 2024 an dawn hi kumin September 27 khan India ram Vice President leh Union Minister for Tourism and Culture-te hnen atangin an lo dawng tawh a. Hemi puala nimin-a hun hman ah hian Sialsuk khua a Tourism tihchangtlun zel dan turte sawiho nghal a ni.