Sawrkar chu zawi zawiin kawng dik lam panin a inher mek niin sawi

Mizoram sawrkar-a Minister Lalthansanga chuan sawrkar chu zawi zawiin kawng dik lam panin a in her mek niin a sawi.

 Nimin-a ZPM party in Aizawl-a an Office-a Chhung Inkhawm an neih ah Minister Lalthansanga chuan kum 40 dawn sawrkâr lo kal tawh dan chu thawk leh khata thlâk hlawk theih ni lo mah se zawi zawiin a insiamrem chhoh zêl tih sawiin, “Inrenchemna kawngah sawrkâr a kal nasa a, sawrkâr Officer-in Office a TV an kawl theih dânte leh kalphung thenkhat dangte pawh siam that zel niin, sawrkâr hi zawi zawiin kawng dik lam panin a inher mêk a ni,” a ti a. Sawrkar in uluk taka sum a enkawl thu sawiin, “Sawrkar hmasa in April-August, 2023 chhûnga a sum pûk chu cheng vbc. 1936.4 a nih laiin ZPM sawrkârah April - August, 2024 chhûnga sum kan pûk zat chu cheng vbc. 977.7 a ni a, ZPM sawrkarah erawh chuan hunbi in ang rengah kan lei bat zat chu cheng vaibelchhe sâng chuangin sawrkâr hmasa nen a inthlau a ni,” a ti.

A enkawl Department a hmalakna thenkhat te pawh tarlangin Minister Lalthansanga chuan, sawrkâr tharah phai lam mithiamte pawh an phur hle a, mithiam-te'n hmasawnna hna thawh kawnga kut rawn thlâk an châk niin a sawi a. “Muga (Pangang chikhat) Project-ah pawh benefeciaries 500 vel thlan an ni dawn a, Mizoram chauh hi India hmarchhak-a Muga khawi theihna awmchhun kan ni,” a ti a. Rubber President of India pawh Mizoram-ah a rawn zin tawh thu sawiin, “Tunah hian Chief Minister Rubber Mission chu kalpui chhoh tan niin, Zirtiri Residential Science College hmun hluiah Training Centre buatsaih a ni dawn,” a ti a. “Mizoram a Sangha thar tam theih dan tur zirtirna neiin phai atangin mithiam rual pawh vawi thum lai an lo kal tawh,” a ti bawk a. “NEC atangin kuhva scope leh a ro siamna tur project min rawn pe dawn a, Country of origin Certificate dik tak Mizoram in kan pe tawh dawn a ni,” tiin, ZPM sawrkârah kuhva tawlhrûk a kimki niin a sawi a. “Tawngtaina nena sai ip puan sina kan dilnate Pathian in min chhâng a, Mizoram hian kawng dik a zawh tan,” a ti bawk.